لوی څارنوال: په لویه څارنوالۍ تغییرات او تبدیلات یو اصل دی
محمد الف عرفاني له اداري فساد سره د مبارزې په چارو کې د لوی څارنوال د مرستیال او فضل سلطان ساپی له لویو جرمونو سره د مبارزې عدلي او قضايي مرکز د عمومي رئيس په توګه د ۱۳۹۷ کال د غبرګولي پر اتمه وټاکل شول.
محمد الف عرفاني د لویې څارنوالۍ ادارې د وړانديز او د افغانستان اسلامي جمهوري دولت عالي مقام د ۴۲۴ ګڼې حکم له مخې د مرستیال په توګه په دنده ګومارل شوی دی. نوموړي تر دې وړاندې له لویو جرمونو سره د مبارزې عدلي او قضايي مرکز عمومي رئیس په توګه دنده ترسره کوله.
له دې سره سم د بدخشان استیناف څارنوالۍ پخوانی رئیس فضل سلطان ساپی د افغانستان اسلامي جمهوري دولت عالي مقام د ۴۴۲ ګڼې حکم له مخې له لویو جرمونو سره د مبارزې عدلي او قضايي مرکز د عمومي رئیس په توګه ګومارل شوی دی.
د یادونې وړ ده، چې د لویې څارنوالۍ د نوې رهبرۍ په راتګ سره په دغه اداره کې د پام وړ مثبت بدلونونه راغلي او دا رهبري د فساد پر ضد کلکه مبارزه کوي.
