دوشنبه؛ له خلکو سره د لوی څارنوال مخامخ لیدنه
د هېواد لوی څارنوال څارنپوه محمد فرید حمیدي د ۱۳۹۷ کال د غويي پر ۳۱ له ۹۱ هېوادوالو سره چې ۵۱ نارینه او ۴۰ مېرمنې وې، په خپل کاري دفتر کې مخامخ ولیدل. د هېواد لوی څارنوال د نوموړو هېوادوالو ستونزې چې د لویې څارنوالۍ اړوند وې، واورېدې او په اړه يې لازمې پرېکړې وکړې.
د دغو ستونزو له ډلې ډېری ستونزې پر جعل او تزویر، سرقت، فرېبکارۍ او له ښځو سره پر تاوتریخوالي راڅرخېدې.
سربېره پر دې لوی څارنوال پر دغه ورځ تر ۲۰۰ ډېرې عریضې احکام او ۵۰ هغه عریضې چې په لویې څارنوالۍ پورې یې تړاو نه درلود، اړوندو ارګانونو ته راجع کړې.
لوی څارنوال د هرې دوشنبې پر ورځ له هېوادوالو سره مخامخ ګوري او د لویې څارنوالۍ اړوند ستونزې يې اوري.
د یادونې وړ ده، چې لوی څارنوال په تېر کال کې تر اووه زرو زیاتو هېوادوالو سره مخامخ لیدلي، د دوی ستونزې يې اورېدلې او په اړه يې لازمې پرېکړې نیولې دي.
هېره دې نه وي، د ځینو ستونزو تفصیلي راپور په ډېر ژر خپور شي.
