د لویې څارنوالۍ د عالي شورا غونډه وشوه
د لویې څارنوالۍ د عالي شورا غونډه د افغانستان د اسلامي جمهوري دولت لوی څارنوال څارنپوه محمد فرید حمیدي په مشرۍ، د ۱۳۹۷ کال د چنګاښ پر ۲۴ وشوه.
د غونډې په پیل کې، د هېواد د امنیتي او دفاعي ځواکونو د بې سارو سرښندنو ستاینه وشوه. په ورته مهال کې، په فاریاب ولایت کې د ځینو کسانو د نیولو پر مهال د هغه شکنجو او ادعاوو په اړه د غونډې غړو ته معلومات وړاندې شول، چې د رسنیو او ټولنیزو شبکو له خوا نشر شوي و. په دغه ناسته کې ټینګار وشو، چې د افغانستان اسلامي جمهوري دولت د یو دولت په توګه د خلکو د ازادۍ او حقونو د ساتنې مسؤولیت لري او په همدې برخه کې د اساسي قانون او نړیوالو ژمنو له مخې ځواب ویوونکی دی.
د هېواد لوی څارنوال د تفتیش ریاست او د شکنجې د مخنیوي کمېټې ته لارښوونه وکړه، چې دغه پېښه د هېواد د نافذه قوانینو له مخې وڅېړي او د اجرااتو د پایلې راپور یې ژر تر ژره وړاندې کړي.
د غونډې په بله برخه کې، د لویې څارنوالۍ د څارنوالانو د ګټو ضد فورمې په اړه بحث وشو. د دغه فورمې له مخې، څارنوالان دې د وظیفوي واکونو څخه د ناوړه استفادې او اداري فساد پر ضد مبارزه کې اغیزناکه فعالیتونه وکړي او د بشري حقونو او انساني کرامت په ساتنه او همداراز د تورنو، مظنونینو او داسې نورو د حقونو په خوندیتوب کې مسؤول وبلل شول.
همدارنګه په یاده شوې غونډه کې ټینګار وشو، چې څارنوالان د دندې د تصدې په جریان کې نشي کولای چې د سیاسي ګوندونو غړیتوب ترلاسه کړي او د سیاسي جریان په ګټه فعالیت وکړي. څارنوالان باید د افغانستان د اسلامي جمهوري دولت لویې څارنوالۍ د څارنوالانو د چلن د مسلکي معیارونو د طرزالعمل د هدایتونو له مخې مسؤول وي او خپلې دندې له هر ډول تبعیض څخه په پاکۍ او د بې پرۍ اصل په رعایتولو سره تر سره کړي.
عالي شورا، د څارنوالۍ د واکونو او تشکیل قانون چې مخکې د لویې څارنوالۍ د تقنین کمېټې له خوا تشرېح او ارزول شوې و، په پرنسیپ کې تائید کړ. همدارنګه یاده شوې طرحه یې د اصولي مراحلو د طي کولو په موخه یادې شوې کمېټې ته واستوله.
د غونډې په وروستۍ برخه کې، د موټر د څښتن او موټر چلوونکي تر منځ د قرارداد د فورم او تضمین په اړه د هېواد په مرکز او ولایتونو کې د نقلیه وسایلو د قانوني چلونې له مخې، بحث وشو.
عالي شورا دغه فورمه تائید کړه او پرېکړه یې وکړه، چې یاده شوی فورمه دې د نورو اجرااتو په موخه اړونده څانګو ته واستول شی. د دغه فورمې په تطبیق کولو سره به نه یواځې په هېواد کې د ترافیکي پېښو کچه راټیټه، بلکې د یادو شویو پېښو د مرتکېبینو او سرغړوونکو د تېښتې مخه به هم ونیول شي.
د یادونې وړ ده، چې دغه فورمه به د هېواد د نافذه قوانینو د احکامو په پلي کولو او د ترافیکي قواعدو او مقرراتو د سرغړونو په مخنیوي کې اغیزناکه واقع شي او په دې سربېره به د ترافیکي پېښو د قربانیانو د حقونو په ساتنه کې هم ښه رول ولري.
