له ښځو سره د تاوتریخوالي پر ضد مبارزې او د ماشومانو سرغړاویو ته د رسیده ګۍ درې ورځنی سیمنار دایر شو
لویې څارنوالۍ له ښځو سره د تاوتریخوالي پر ضد مبارزې او د ماشومانو سرغړاویو ته د رسیده ګۍ درې ورځنی سیمنار د ۱۳۹۷ کال د زمري پر ۲۰ په کابل کې دایر کړ.
په دغه سیمنار کې لوی څارنوال څارنپوه محمد فرید حمیدي، د ښځو چارو وزیرې دلبر نظري، د کار او ټولنیزو چارو وزیر فیض الله ذکي، د لوی څارنوال مرستیالانو او د دغې ادارې رئیسانو، له ښځو سره د تاوتریخوالي پر ضد مبارزې او د ماشومانو سرغړاویو ته د رسیده ګۍ څارنوالانو او د حقونو د پراختیا مؤسسې (IDLO) استازیو ګډون کړی و.
د یاد شوي سیمنار په پرانیسته کې د هېواد لوی څارنوال وویل، چې د کارکوونکو د ظرفیت لوړاوی د لویې څارنوالۍ د رهبري پلاوي په لومړیتوبونو کې راځي. ښاغلي حمیدي په همدې تړاو زیاته کړه: «موږ د لويې څارنوالۍ د کارکوونکو د ظرفیت لوړاوي په موخه له لوړو زده کړو وزارت سره یو هوکړه لیک لاسلیک کړی، چې پر اساس يې دا وزارت هر کال ۶۰ څارنوالان د ماسټرۍ په برخه کې روزي.»
ښاغلي حمیدي یاد شوي سیمینار ته په اشارې سره وویل، چې دا ډول سیمنارونه نه یواځې د کارکوونکو د ظرفیت لوړاوي په برخه کې مرستندوی ثابتېدای شي؛ بلکې د عامه پالیسۍ او د قانون د واکمنۍ په برخه کې هم ګټور ثابتېږي.
د نوموړي په وینا، لویې څارنوالۍ تل هڅه کړې، چې د عدالت د تأمین، د قانون د واکمنۍ او د کورنیو د سلامتیا په موخه خپلو کارکوونکو ته کاري اسانتیاوې چمتو کړي.
د هېواد لوی څارنوال وویل: «په نژدې راتلونکي کې به هغه څارنوالانو ته چې د خدمت ټاکل شوی وخت يې بشپړ کړی وي، د څارونکو کادري درجې ورکړل شي.»
د هېواد لوی څارنوال زیاته کړه، چې موږ په ۳۴ ولایتونو کې له ښځو سره د تاوتریخوالي پر ضد مبارزې څارنوالۍ ایجادې کړې دي او په ۳۱ ولایتونو کې دا څارنوالۍ د ښځینه څارنوالانو له خوا اداره کېږي.
نوموړي د ښځو د حقونو د دفاع لپاره وویل: «لویه څارنوالي له ازادۍ پر محرومو سیمو د نظارت اناثیه څارنوالۍ ایجادوي او دا څارنوالۍ به په مرکز او ولایتونو کې د ښځینه زندانیانو قضیې او په زندان کې د دوی د ژوند وضعیت څاري.»
د هېواد لوی څارنوال په سیمینار کې ګډون کوونکو څارنولانو ته وویل، چې د افغانستان څېره له تاوتریخوالي ډکه څېره نه ده؛ بلکې دلته پر ماشومانو شفقت او د ښځو احترام کېږي، هر څوک چې له ښځو او ماشومانو سره تاوتریخوالی وکړي، د عدالت له ځواکمنو لاسونو سره به مخامخ شي.
د لوی څارنوال په وینا: «د معافیت فرهنګ له منځه تللی او له مجرم او سرغړونکي سره به قانوني چلن کېږي.»
ښاغلي حمیدي یادونه وکړه، چې د تاوتریخوالي له قربانیانو سره باید په پوره حوصلې چلن وشي او غوښتنو ته يې د قناعت وړ ځوابونو ورکړل شي.
د هېواد لوی څارنوال له ماشومانو سره پر نېک چلن هم ټینګار وکړ او زیاته يې کړه، چې ماشوم د هېواد راتلونکی دی او له دوی څخه باید په نظامي او سیاسي فعالیتونو کې استفاده ونه شي.
له دې سره سم د ښځو چارو وزیرې دلبر نظري هم د دا ډول سیمنارونو ترسراوی ګټور وباله او د قانون په واکمنۍ، د عدالت په تأمین او د ښځو او ماشومانو د سرغړاویو پر ضد يې د لویې څارنوالۍ همېشنۍ هڅې وستایلې.
اغلې نظري د لويې څارنوالۍ له رهبرۍ وغوښتل، چې د ښځو د تاوتریخوالي په قضیو کې له ښکېلو کسانو سره جدي او قانوني چلن وکړي. نوموړې لوږه، جنګ او د لیک لوست د کچې ټيټوالی له ښځو سره د تاوتریخوالي عمده لامل ګڼي او په کورنیو کې تاوتریخوالی د هېواد د ودې لوی خنډ بولي.
د ښځو چارو وزیرې وویل، چې د مېرمنو د حقونو له مدافع بنسټونو سره په ځانګړې توګه له عدلي او قضايي ادارو سره له نژدې کار کوي او په دې برخه کې يې ګټورې پايلې هم ترلاسه کړې دي.
د اغلې نظري په وینا، په عدلي او قضايي ادارو کې د ښځو شتون د هېواد د پرمختګ ښکارندويي کوي او له دې سره ښځې هم عدالت ته لاسرسی پيدا کوي. د ښځو چارو وزیرې دا چاره له مېرمنو سره د تاوتریخوالي د کچې په راټيټولو کې اغېزناکه ګڼي.
په ورته مهال کې د عدليې وزارت ارشد مشاور قانونپوه محمد اشرف رسولي له د ښځو سره د تاوتریخوالي پر ضد څارنوالیو فعالېدنه یوه ستره لاسته راوړنه وبلله.
په ورته مهال کې د IDLO مؤسسې استازې لیزلي شنایدر هم څارنوالانو ته په خطاب کې وویل، څارنوالان د عدالت ملاتړي دي او دوی باید هڅه وکړي، چې د تاوتریخوالي له زیانمنو کسانو سره پوره عدالت وکړي.
اغلې شنایدر د ماشومانو د محکومېدو په اړه یادونه وکړه، چې ډېری وخت د ماشومانو بندي کول د ماشومانو د اصلاح سبب نه کېږي؛ بلکې عقده يي کېږي. اغلې شنایدر په دې برخه کې وویل، چې د ماشومانو د حبس پر بدیل هم باید فکر وشي.
د یادونې وړ ده، چې په دغه سیمینار کې د هېواد له مرکز او ولایتونو څخه د لویې څارنوالۍ له ښځو سره د تاوتریخوالي پر ضد مبارزې او د ماشومانو سرغړاویو ته د رسیده ګۍ ۱۰۵ نارینه او ښځینه څارنوالانو او ګڼو نورو مسؤولانو ګډون کړی و.
