لویې څارنوالۍ د ځینو وزارتونو او خپلواکو دولتي ادارو د جنډر له مسؤولانو سره د همغږۍ ناسته وکړه
په دغه ناسته کې د لویې څارنوالۍ د ښځو پر وړاندې د تاوتریخوالي او د ماشومانو د سرغړنو د مخنیوي مرستیالۍ مشاور عبدالحمید صمدي، د یادې مرستیالۍ ځینو کارکوونکو، د اطلاعاتو او فرهنګ، معدنونو او پطرولیم وزارتونو، د سترې محکمې، د امنیت شورا دفتر، هوانوردۍ، کابل شاروالۍ، ولسي جرګې او مشرانو جرکې د جنډر مسؤولانو ګډون کړی و.
یاده ناسته د ۱۳۹۸ کال د وري پر ۲۶ د حقونو د پراختیا نړیوال سازمانIDLO)) په همکارۍ، د ښځو پر وړاندې د تاوتریخوالي او د ماشومانو د سرغړونو د مخنیوي مرستیالۍ د ناستو په تالار کې وشوه.
په لویه څارنوالۍ کې د ښځو پر وړاندې د تاوتریخوالي او د ماشومانو د سرغړونو د مخنیوي مرستیالۍ مشاور عبدالحمید صمدي، له لویې څارنوالۍ سره د یادو ادارو د جندر څانګو همغږي کول او د ښځو پر وړاندې د تاوتریخوالي قانون، د ښځو د ځورونې د مخینوي قانون او همداراز په جزا کود کې د ښځو پر وړاندې د تاوتریخوالي د مخنیوي قانون اړوند د ځينو مادو په اړه پوهاوی د یادې ناستې موخه وبلله.
د ښاغلي صمدي په خبره، تمه ده چې لویه څارنوالي به په نږدې راتلونکو کې په وزارتونو او بېلابېلو ادارو کې ورته پروګرامونه جوړ کړي.
له بلې خوا د معدنونو او پطرولیم وزارت د جنډر امرې خدیجې کاظمي وویل، چې ورته پرګرامونه په ادارو کې د ښځو پر وړاندې د تاوتریخوالي کچې کمولو لپاره ښه لارښوونه کولای شي. همداراز د سترې محکمې د جنډر مسؤولې شهلا احمدي دا ناسته ګټوره وبلله او زیاته یې کړه، چې ورته ناستې په ادارو کې د ښځو پر وړاندې د تاوتریخوالي د مخنیوي په برخه کې اغیزناک رول لوبولای شی.
