د کابل نیوز د خبریال عبدالمنان ارغند قاتلین په اعدام محکوم شول
د افغانستان د اسلامي جمهوري دولت لویې څارنوالۍ د کابل نیوز د خبریال د وژنې قضیه له بشپړې څېړنې وروسته محکمې ته واستوله او د یادې قضیې عاملین یې د ۱۳۹۸ کال د وري پر ۱۷ د جزا کود د ۲۶۷ مادې له مخې په اعدام محکوم کړل.
عبدالمنان ارغند په یوه ترورېستي حمله کې تېر کال په کندهار کې ووژل شو. د نوموړي له وژنې سره سم لویې څارنوالۍ کشفي او امنیتي ادارو ته هدایت ورکړ، تر څو د یادې قضیې عاملین تر پېژندلو وروسته ونیسي او دوسیه یې څارنوالۍ ته واستوي. کشفي ادارو د اړونده قضیې په تور دوه کسان نیولې او له څېړنې وروسته یې دوسیه د کندهار استیناف څارنوالۍ ته واستوله.
په ورته مهال کې د عبدالمنان کورنۍ او د افغانستان د ژورنالېستانو فدراسیون غوښتنه وکړه، چې د نوموړي دوسیه دې په کابل کې وڅېړل شي. د دوی د غوښتنو او د لویې څارنوالۍ د هدایت پر بنسټ یاد تورن او د دوی دوسیې کابل ته انتقال شول او د محکمې له خوا چې په دغه قضیه کې یې مستقیم لاس درلود د ۱۳۹۷ کال د وري پر ۱۷ په اعدام محکوم شول.
لویه څارنوالي د بیان ازادۍ او د خبریالانو ملاتړ ته ژمنه ده او یو ځل بیا ډاډ ورکوي، چې د خبریالانو پر ضد د تاوتریخوالي قضیې به جدي او پرېکنده توګه وڅېړي او د ورته قضیو عاملین به د عدل او انصاف اصل په رعایتولو د قانون د احکامو له مخې د قانون منګولو ته وسپاري.
دا په داسې حال کې ده، چې لویې څارنوالۍ د خبریالانو پر ضد د تاوتریخوالي تر ۵۰ زیاتې قضیې څېړلې دي.
