شپږ کسان له واک څخه د ناوړه ګټې اخېستې او غدر په تور محاکمه شول
د اداري فساد له لویو جرمونو سره د مبارزې عدلي او قضایي مرکز د استیناف محکمې، شپږ کسان له واک څخه د ناوړه ګټې اخېستنې او غدر په تور د ۱۳۹۸ کال د غویي پر څلورمه په علني ډول محاکمه کړل.
په دغه قضایي ناسته کې، د میدانوال امرخيل شرکت رئیس محمد عالم د محمد علم زوی، د ملي بس د اول نمبر تصدۍ رئیس غوث الدین د پنجې بای زوی، د ملي بس د دویم نمبر تصدۍ رئیس محمد آصف د محمد افضل زوی، د ملي بس د تصدۍ د محاسبې آمر عبدالغفور د عبدالحمید زوی، د ملي بس د دویمې حوزې د حوالو مدیر ګلمیر د عبدالصمد زوی او د ملي بس د درېیمې حوزې د حوالو مدیر محفوظشاه د محبوبشاه زوی محاکمه شول.
د دغه قضایي ناستې پلاوي، محمد عالم او عبدالغفور په غدر کې د لاس لرلو په تور، د جزا کود د ۱۷ او ۳۹۸ او د جزایي اجرااتو قانون د ۲۷۳ مادې په رعایتونې، هر یو د جزا قانون د ۳۹ او ۲۷۰ مادې له مخې په یو کال او شپږو میاشتو تنفیذي بند محکوم کړل. پر دې سربېره محمدعالم د شل میلیونه و ۱۹۷ زره او ۱۹۸ افغانیو په ورکړه هم محکوم شو.
همداراز د یادې ناستې د قضایي پلاوي د پرېکړې پر بنسټ، ګلمیر او محفوظشاه د غدر په تور د جزا کود د ۱۷ او د جزايي اجرااتو قانون د ۲۳۷ مادې په رعایتونې، د جزا قانون د ۳۹ او ۲۷۰ مادې له مخې په شپږ شپږ میاشتو تنفذي بند محکوم شول.
محمد آصف او غوث الدین له واک څخه د ناوړه ګټې اخېستنې په تور، د جزا کود د ۱۷ مادې په رعایتونې، هر یو د جزا قانون د ۲۵۸ مادې له مخې د دوولس زره افغانیو نغدي جریمې په ورکړه محکوم شول.
همدا ډول د دغې قضایي ناستې رئیس، د جزایي اجرااتو قانون د ۱۹مادې له مخې، د ملي بس د تصدۍ د کنترول مدیر مبارکشاه، د ملي بس د تصدۍ رئیس غلام حضرت او د مالي وزارت د قراردادونو د ارزونې مسؤولان، چې یاد قراردادونه یې د قانون د احکامو د رعایتونې پرته منظور کړي، د عدلي تعقیب وړ وګڼل.
