په لویه څارنوالۍ کې اته ساختماني پروژې بشپړې او ګټې اخېستنې ته چمتو دي
د لویې څارنوالۍ د مالي او اداري چارو مرستیالۍ د راپور پر بنسټ، روان کال د لویې څارنوالۍ په دارالامان ودانۍ کې اته ساختماني پروژې بشپړې شوې، چې ځينې یې ګټې اخېستنې ته هم سپارل شوې دي.
په یادو پروژو کې د غونډو د تالار وداني، یو جومات، کانتین، د ښه راغلاست وداني، دوې کانکس ودانۍ، شنه ساحه، د تشنابونو بیا رغونه او د پنجرو او ورونو د پردو نصبول شامل دي.
د یاد راپور پر بنسټ، د جومات، ښه راغلاست مرکز، کانکسونو، شنې ساحې او د تشنابونو د بیا رغونې کارونه سل سلنه بشپړ او ګټې اخېستنې ته سپارل شوي دي او د غونډو د تالار، کانتین او د پردو د نصب کارونه چې ۷۵ سلنه بشپړ شوې، دوام لري.
د وړاندې شوو شمېرو له مخې، د جماعت په جوړونه درې میلیونه او ۶۹۷ زره او ۴۵۰ افغانۍ، د ښه راغلاست پر مرکز لس میلیونه او ۱۵۴ زره او ۷۸۶ افغانۍ، د غونډو پر تالار څلور میلیونه او څلور سوه زره او ۷۱۱ افغانۍ لګښت راغلی، چې د یادې ادارې له عادي بودیجې څخه ورته ځانګړې شوې دي.
همداراز له عادي بودیجې څخه، د دوو کانکسونو پر ودانیو لس میلیونه او ۹۴۹ زره او ۵۰۰ افغانۍ، د کانتین په ودانۍ یو میلیون او ۹۹۱ زره او ۲۴۰ افغانۍ، د شنې ساحې پر جوړونه ۸۶۱ زره او ۷۰۰ افغانۍ، د تشنابونو په بیا رغونه دوه میلیونه او ۶۴۵ زره او ۹۷۵ افغانۍ او د پردو پر نصب څلور میلیونه او ۲۷۰ زره او۷۰ افغانۍ لګېدلې دي.
