لویه څارنوالۍ کې د ښوونکي نړیواله ورځ ونمانځل شوه
په یاده نمانځغونډه کې چې د ۱۳۹۸ کال د تلې پر ۱۵ د لویې څارنوالۍ دارالامان ودانۍ کې جوړه شوې وه، د لوی څارنوال د مالي او اداري چارو مرستیال وحیدالدین ارغون، د بشري سرچینو د پراختیا عمومي رئیس محمد ناصر همت، د ښځو د ملاتړ رئیسې لیدا حیدري، د وړکتون ښوونکو او د یادې ادارې ځينو کارکوونکو ګډون کړی و.
په مالي او اداري چارو کې د لوی څارنوال مرستیال وحیدالدین ارغون د ښوونکي مقام ته په درناوي سره وویل: «ښوونه یوه پاکه دنده ده، چې د هېوادونو په پرمختګ کې رغنده رول لوبوي.» د ښاغلي ارغون په خبره، ښوونې او روزنې ته وده ورکول له غربت، بې ځایه کېدو او بیکاریو څخه د خلاصون یوازنۍ لاره ګڼل کېږي. نوموړي د وړکتون ښوونکو ته په اشارې سره وویل، تاسو د ماشومانو لپاره تر ټولو غوره لارښوونکي یاست؛ نو د دوی د ښوونې او روزنې په برخه کې باید زیاته پاملرنه وکړئ. نوموړي همداراز وویل، چې لویه څارنوالي هم د یادې ادارې وړکتون ته جدي پاملرنه کوي.
په ورته مهال کې د بشري سرچینو د پراختیا عمومي رئیس محمد ناصر همت د ښوونکي د ورځي د مبارکۍ تر څنګ وویل: «ښوونکی هغه څوک دی، چې ټولنې ته مثبت بدلون ورکوي او په دې برخه کې مهم رول لوبوي.» ښاغلي همت، له ښوونځي وړاندې د ماشومانو روزل د دوی بنسټ وباله او ویې ویل، چې دا ښوونه په نړۍ کې د ښوونې او روزنې بنسټيزه برخه جوړوي او ترټولو زیاته پانګه اچونه په همدې برخه کې کېږي. د نوموړي په خبره، لویه څارنوالي د یادې ادارې وړکتون ته جدي پاملرنه کوي او د دغې ادارې ټول شته امکانات یې د دوی په واک او اختیار کې ورکړي دي.
له بلې خوا، لویه څارنوالۍ کې د ښځو د ملاتړ رئیسې لیدا حیدري د وړکتون ښوونکي د ماشومانو د ودې په برخه کې اغېزناک وبلل او ویې ویل: «ښوونکی ماشومانو ته د ژوند کولو څرنګوالۍ، تګلاره ټاکل او د ژوند کولو موخه روښانه کوي.» د آغلې په خبره، هغه ماشومان چې په وړکتون کې په ښوونه او روزنه بوخت دي د نورو په پرتله فعال، زړه ور او توانمن وي.
د یاودنې وړ ده، چې د ښوونکي نړیواله ورځ د تلې پر دیارلسمه چې د میلادي کال د اکتوبر له پنځمې سره برابرېږي، د افغانستان په هره برخه او ځینو نورو هېوادونو کې نمانځل کېږي او لویه څارنوالي یې هم هر کال نمانځي.
