د پلان او راپور جوړونې دوه ورځنی روزنیز پروګرام جوړ شو
د پلان او راپور جوړونې دوه ورځنی روزنیز پروګرام جوړ شو
مرغومي ۱۵، ۱۳۹۹
دا روزنیز پروګرام د لويې څارنوالۍ د پالیسۍ، پلان او نظارت ریاست له خوا د افغانستان د عدلي سکتور (JSSP) په مرسته د دغې ادارې ۳۰ کارکوونکو ته د ۱۳۹۹ لمریز کال د مرغومي پر ۱۵ د یکشنبې پر ورځ ترسره شو.
د دغه پروګرام د ترسراوي موخه د دې ادارې د کارکوونکو ظرفیت لوړاوی، پلان جوړول، راپور ورکول او په دې برخه کې د ننګونو کمول بلل شوي دي.
د لويې څارنوالۍ د پالیسۍ، پلان او نظارت رئيس رحیم الله صافي د دغه پروګرام ترسراوی ګټور وباله او زیاته یې کړه: «له پلان جوړونې سره بلدتیا د ادارې له اجرااتو سره مستقیمه اړیکه لري.» ښاغلي صافي د دغه پروګرام له ګډونوالو وغوښتل، چې له دې برنامې دې اعظمي ګټه واخلي او هڅه دې وکړي، چې په خپلو اجرااتو کې په ټولګي کې زده کړي موارد پلې کړي.
د ښاغلي صافي په باور، دا ریاست د ګزارش په برخه کې له ځینو ستونزو سره مخامخ و؛ خو هڅه دې وشي چې دغه ټکي ته پوره پام او په دې برخه کې ستونزې ژر تر ژره هوارې شي. نوموړي زیاته کړه: «د پلان د اجرا په برخه کې د ننګونو د مخنیوي په موخه باید پخپله پلان ګټور او ښه جوړ شي.»
په دغه پروګرام کې د پلان، پلان جوړونې، د پلان موخې، د پلان جوړونې د پړاوونو او ننګونو په تړاو په عملي او تیوري توګه ګډونوالو ته روزنه ورکړل شوه او د دې تر څنګ د راپور د تعریف، ماهیت او جوړښت په اړه هم ګډونوالو ته معلومات ورکړل شول.
د یادونې وړ ده، چې لویې څارنوالۍ په مرکز او ولایتونو کې تل هڅه کړې، چې د دغې ادارې د کارکوونکو د ظرفیت لوړاوي په موخه ورته روزنیز پروګرامونه ترسره کړي.
