د لويې څارنوالۍ د کارکوونکو امنیت او خوندیتوب موږ ته لومړیتوب لري
د لويې څارنوالۍ د کارکوونکو امنیت او خوندیتوب موږ ته لومړیتوب لري
د هېواد لوی څارنوال څارنپوه محمد فرید حمیدي د افغانستان د عدلي او قضايي سکتور د سروې د مقدماتي موندنو اعتبار ورکولو په غونډه کې چې د اسیا بنسټ (Asia Foundation) له خوا جوړه شوې وه، وویل: «د لویې څارنوالۍ د کارکوونکو خوندیتوب او امنیت دغې ادارې ته مهم دی، چې په دې برخه کې له ټولو امکاناتو استفاده کوي.»
دا دوه ورځنۍ غونډه د استیناف څارنواليو رئيسیانو او مالي آمرانو ته او د مرکز د ځينو رئیسانو په حضور د ۱۳۹۹ لمریز کال د سلواغې پر لومړۍ پای ته ورسېده.
د هېواد لوی څارنوال په دې غونډه کې وویل، افغانان د هر بل ملت په نسبت د امن، عدالت او قانونیت په فضا کې د ژوند کولو مستحق دي. نوموړي د سولې خبرو ته هیله مندي وښووله او ویې ویل: «هیله من یو، چې د سولې پروسه د افغانستان د خلکو په خیر پای ته ورسېږي او یو سوله ییز افغانستان ولرو.»
ښاغلي حمیدي د عدالت پر رول او تأمینولو ټینګار وکړ او زیاته یې کړه، د نظام بقا د قانون او نظم پر استمرار او عدالت ولاړه ده او له نېکه مرغه دا فرصت د لویې څارنوالۍ په اختیار کې دی.
ښاغلي حمیدي د دغې ادارې شهیدان د عدالت شهیدان وبلل او هغوی ته یې د خدای له درباره جنت او کورنیو ته یې د جمیل صبر دعا وکړه. ښاغلي حمیدي د عدالت پر تأمین ټينګار وکړ او ویې ویل، چې د امنیت نشتوالی د عدالت د تأمین پر وړاندې جدي ستونزه ده، چې دمګړۍ دا اداره ورسره لاس و ګرېوان ده. نوموړي زیاته کړه: «عدالت ته د خلکو لاسرسي د نظام او دولت د ملاتړ سبب کېږي، دې ادارې په تېرو دوو کلونو کې د هېواد په لرو پرتو سیمو کې د عدلی خدمتونو د وړاندې کولو په موخه پرله پسې هڅې کړې دي.»
د ښاغلي حمیدي په وینا، د لويې څارنوالۍ د کارکوونکو امنیت او خوندیتوب د دغه ادارې یو مهم مسؤولیت دی او هڅه کېږي، چې په دې برخه کې له ټولو امکاناتو استفاده وشي. نوموړي د دغې ادارې له کارمنو وغوښتل، چې د امنتیي کارکوونکو د امنیت نیولو ترڅنګ پخپله هم له احتیاط څخه کار واخلي.
د نوموړي په باور، له مراجعینو سره نېک چلن او د هغوی کرامت ساتنه د دغې ادارې د کارکوونکو په امنیت کې مهم رول درلودلی شي. د نوموړي په وینا، د خلکو ملاتړ او رضایت د کارکوونکو د امنیت، اساسي او بنیادي عنصر تشکیلوي.
لوی څارنوال د خپلو خبرو په دوام زیاته کړه، د دغې ادارې اساسي دنده د افغانانو د عزت، کرامت او حقوقو او ازادیو دفاع ده او له خلکو سره په حوصلې چلن د څارنوال د بریا راز دی.
ښاغلي حمیدي د دغه پروګرام د تدویر په پار د اسیا بنسټ مننه وکړه او د عدلي او قضايي بنسټونو د ملاتړ په برخه کې یې د دغه بنسټ رول مهم وباله. نوموړي د دغې غونډې ترسراوی مهم وباله او ویې ویل، د اسیا بنسټ مقدماتي موندنو ارزونه د عدلي او قضايي بنسټونو په ځانګړې توګه د لويې څارنوالۍ مهمه اړتیا ده او د دغې ادارې سروې به په مرکز او ولایتونو کې د لویې څارنوالۍ د کارکوونکو په خوندیتوب کې مرسته وکړي.
په ورته وخت کې د اسیا – افغانستان بنیاد سرپرستې جینا کریم د دې غونډې له ګډونوالو مننه وکړه او ویې ویل، چې دا بنسټ کوښښ کوي، ورته نورې غونډې هم ترسره کړي. د اغلې کریم په وینا، امنیتي مسایل ننګوونکي دي، چې دا ستونزه عدلي او قضايي ادارې د پلانونو په تطبیق کې له ستونزو سره مخامخوي.
نوموړې د قانون د حاکمیت په برخه کې د لویې څارنوالۍ د فعالیتونو مننه وکړه او زیاته یې کړه، چې دا بنسټ به له لویې څارنوالۍ سره همکار وي او له دغه بنسټ سره يې د ګډونوالو نظریات هم مرستندوی وبلل.
د اسیا بنیاد د قانون د حاکمیت او حکومتولۍ برخې رئيس ادریس الهام په دې غونډه کې وویل، دغه بنسټ د قانون د حاکمیت په برخه کې هڅې کړې او زیاته یې کړه، عدالت د ټولو سیاسي نظامونو زړه او اساس دی.
د نوموړي په وینا، دغه بنسټ په تېرو دوو میاشتو کې د عدلي او قضايي بنسټونو د امنیتي ننګونو په برخه کې د هېواد په ۳۴ ولایتونو کې ۲۶۳ مرکزه ارزولي او د عدلي او قضايي بنسټونو له ۵ زرو او ۴۰۰ کارکوونکو سره یې له نژدې خبرې کړې دي.
د نوموړي په وینا، د دغې غونډې د ترسراوي موخه د یاد شوي بنسټ موندنو ته د اعتبار ورکول دي او د ګډونوالو نظریات به د دغه بنسټ له راروانو ارزونو سره مرستندوی وي.
د دې تر څنګ د لویې څارنوالۍ د امنیتي کمېسیون رئيس محمد نواب احمدزي د دغې غونډې د جوړېدو په پار د اسیا بنسټ مننه وکړه او ويې ویل، لویه څارنوالي د خپلو کارکوونکو د خوندیتوب په برخه کې له ټولو امکاناتو استفاده کوي.
ښاغلي احمدزي وویل، چې د لویې څارنوالۍ د کارکوونکو د هدفي وژنو دلیل د دوی د عدالت د تأمین او قانون د ښه حاکمیت له کبله دي. د نوموړي په وینا، د لويې څارنوالۍ کارکوونکي د خپلو همکارانو له شهیدېدو سره سره افغانانو ته خدمت کوي.
