د مشرانو جرګې درې سناتوران د اداري فساد په تور په بند محکوم شول
د مشرانو جرګې درې غړي هر یو، لیاقت الله بابکرخېل د فیض محمد زوی، محمد انور باشلیق د قربان زوی او عظیم قویاش د محمد کریم زوی، د ۶۰ زرو امریکايي ډالرو د رشوت غوښتلو په تور د اداري فساد له لویو جرمونو سره د مبارزې عدلي او قضايي مرکز ابتداییه محکمې له خوا محاکمه شول.
دا درې کسان چې د عایداتي ادارو د حیرتان بندر ګمرک د ارزونې په موخه د مشرانو جرګې خوا بلخ ولایت ته توظیف شوي وو، د کنټرول او مراقبت څارنوالۍ له خوا د ۱۳۹۹ لمریز کال د تلې پر اوومه په بالفعل ډول د ۶۰ زرو امریکايي ډالرو د بډو غوښتلو له مجموعې د ۴۰ زرو امریکايي ډالرو د بډو اخیستلو په تور ونیول شول او قضیه یې د ارزونې او تحقیقاتو د بشپړېدا په موخه د ۱۳۹۹ لمریز کال د تلې پر ۲۳ د اداري فساد له لویو جرمونو سره د مبارزې عدلي او قضايي مرکز ته واستول شوه.
د قضيې موظف څارنوال د اسنادو او شواهدو له راټولولو او د قانون پر اساس د تحقیق تر بشپړولو وروسته د تورنو پر وړاندې د الزام د اووه دلایلو له مخې، نوموړو ته له محکمې څخه د جزا کوډ د ۳۷۰، ۳۷۱ او ۳۸۵ مادو پر اساس د څه باندې لسو کالو بند غوښتنه وکړه.
د اداري فساد له لویو جرمونو سره د مبارزې عدلي او قضايي مرکز ابتداییه محکمې د جزا کوډ د ۳۷۰ مادې دویم او شپږم بند او ۳۸۵ مادو پر اساس د مدافع وکیل په حضور کې تورن په غیابي ډول هر یو پر لسو کالو او یوې میاشتې تنفیذي حبس او د تضامن په توګه پر ۴۰ زرو امریکايي ډالرو نقدي جزا محکوم کړل.
دا په داسې حال کې ده، چې دوه اوونۍ مخکې هم د دغه مرکز له خوا د هرات ښاروال له شپږو نورو کسانو سره د اداري فساد په جرم پر درېیو کالو بند او ۷۵ زره امریکايي ډالرو نقدي جزا محکوم شوي وو.
