د لویې څارنوالۍ د ۴۶ دولتي ادارو ترمنځ د ښځینه کارکوونکو د زیاتوالي د پالیسۍ د تطبیق له پلوه لومړی مقام وګاټه
په دولتي ادارو کې د ښځينه کارکوونکو د زیاتوالي د پالیسۍ د نظارت او تطبیق د راپور پر اساس، چې اداري اصلاحاتو او ملکي خدمتونو د خپلواک کمېسیون له خوا ترسره شوی، د افغانستان اسلامي جمهوري دولت لویې څارنوالۍ د ۴۶ دولتي ادارو ترمنځ لومړی مقام او ستاینلیک ترلاسه کړ.
د دغه راپور پر اساس د اداري اصلاحاتو او ملکي خدمتونو خپلواک کمېسیون لومړی او د لوړو زده کړو وزارت دویم مقام ګټلی دی.
د ملکي خدمتونو ادارو کې د ښځو د مشارکت د زیاتوالي پالیسۍ تطبیق او نظارت د ۴۰ ځانګړنو پر اساس د اداري اصلاحاتو او ملکي خدمتونو د خپلواک کمېسیون له خوا ترسره شوی، چې د ښځينه کارکوونکو ګومارنه، د ښځینه کارکوونکو ظرفیت لوړاوی، خوندي کاري چاپېریال، د ښځینه کارکوونکو د ځورونې پېښو ته د رسیدګۍ میکانیزمونه او د ښځينه کارکوونکو د بریا د داستانونو خپروای پکې راځي.
په همدې موخه نن یوه غونډه د اداري اصلاحاتو او ملکي خدمتونو د کمېسیون د رئيس نادر نادري، د وزارتونو او دولتي ادارو د بشري سرچینو د رئیسانو او د مېرمنو د ملاتړ (جنډر) رئيسانو په حضور په یاد شوي کمېسیون کې ترسره شوه. په دې غونډه کې د ښځو د ګومارنې او ملاتړ تر څنګ، لويې څارنوالۍ ته د یادې پالیسۍ د تطبیق له کبله لومړی مقام او ستاینلیک ورکړل شو.
د افغانستان اسلامي جمهوري دولت لویه څارنوالي د هېواد د بېلابېلو قشرونو مشارکت په ځانګړې توګه د مېرمنو فعال او ګټور مشارکت ته ژمنتیا لري او دا چاره د قانون د تطبیق او د عدالت د تأمین په برخه کې یوه اساسي اړتیا ګڼي. په تېرو څلورو کلونو کې په دې اداره کې د ښځینه کارکوونکو شمېر له ۲ سلنې څخه ۲۲ سلنې ته لوړ شوی او ظرفیت د لوړاوي په ځانګړې توګه د ښځینه کارکوونکو د لوړو زده کړو لپاره یې ګڼ پروګرامونه طرح او عملي کړي دي.
د یادونې وړ ده، چې تر دې مخکې هم لويې څارنوالۍ د دولتي ادارو ترمنځ د معلولو کسانو د ګومارنې په پار هم لومړی مقام ګټلی و.
