د نفتي موادو د تصدۍ پخوانی رييس په درې کاله بند او د ۵۷۴ زره او ۲۲۱ امریکایي ډالرو نقدي جزا پر ورکړې محکوم شو
د نفتي موادو د تصدۍ پخوانی رييس عبدالولید تمیم د عبدالرحیم زوی له واکه د ناوړې ګټې اخیستنې په تور له لویو جرمونو سره د مبارزې عدلي او قضایي مرکز ابتداییه محکمې د ۱۴۰۰ لمریز کال د غویي پر پنځمه محاکمه کړ.
د موظف څارنوال د صورت دعوا پر بنسټ، د افغانستان اسلامي جمهوري دولت د اړتیا له مخې ۸۰۰۰ ټنه اوبلن ګاز اخیستو په موخه له حکومتي ادارو جوړ ګډ پلاوی ټاکي او له ترکمنستانه یاد شوي ګاز اخلي؛ تر څو یاد ګاز د ۹۳، ۹۴، ۹۵ او ۱۳۹۶ کلونو کې د تصدۍ ریاست له خوا په اړوندو ادارو وپلوري.
له بررسۍ وروسته په ډاګه کېږي، چې ۱۰۶۶ ټنه اوبلن ګاز د تصدۍ ریاست له خوا په وخت پلورل کېږي او متباقی د ضایعاتو، کسراتو او خطرونو له پام نیولو پرته په ثابت ډول ساتل شوي دي. دې سره یې د دولت پیسې په راکد ډول ساتلي، چې په پایله کې د نفتي تصدۍ ریاست رييس له خوا په وخت سره د نه عمل له کبله دولت ته د ۵۶۹ زره او ۹۵۰ امریکايي ډالره زیان اړولی دی.
د قضیې موظف څارنوال د تحقیق او صورت دعوا له ترتیبه وروسته د اسنادو او مدارکو پر بنسټ له قضایي پلاوي د عبدالولید تمیم پر ضد له واکه د ناوړې ګټې اخیستنې په تور د جزا قانون د ۲۸۵ مادې دوهم بند او د یاد قانون د شپږمې مادې د دوهمې فقرې او همدارنګه د جزا کود د ۱۷ مادې په رعایتولو سره د مجازاتو غوښتنه وکړه.
له لویو جرمونو سره د مبارزې عدلي او قضایي مرکز ابتداییه محکمې د څارنوال د دعوا له اقامې او د تورن د مدافع وکیل د دفاعیې له اوریدو وروسته؛ د نفتي موادو د تصدۍ پخوانی رييس عبدالولید تمیم له واکه د ناوړې ګټې اخیستنې په تور د قانون له حکم سره سم، غیاباً په درې کاله تنفیذي بند او د او د ۵۷۴ زره او ۲۲۱ امریکایي ډالرو نقدي جزا په ورکړې محکوم کړ.
