له مراجعینو او هېوادوالو سره د سرپرست لوی څارنوال لیدنه
د افغانستان اسلامي جمهوري دولت لویې څارنوالۍ سرپرست محترم ذبیح الله کلیم نن دوشنبه د ۱۴۰۰ لمریز کال د غبرګولي پر ۳۱ د مراجعینو عریضو او غوښتنو ته د رسیدګۍ په موخه مخامخ له ځینو هېوادالو سره ولیدل.
سرپرست لوی څارنوال د دوشنبې کاري ورځې د هېوادوالو قانوني غوښتنو، د ستونزو هواري او د دوی نسبتي دوسیو ته د بېړنۍ رسېدنې لپاره ځانګړې کړې ده. ښاغلی کلیم د دوشنبې پر ورځو د هېواد له ګوټ ګوټ څخه له لسګونو هېوادوالو سره ګوري او د هغوی ستونزې اوري.
دا لیدنې د حقوقي سلاکارانو او د لویې څارنوالۍ د ځینو ریاستونو د رئیسانو په حضور د مراجعینو عریضو ته د بېړنۍ رسېدنې او په تړاو یې د اجرااتو د ډاډ د ترلاسي په موخه کېږي.
د لویې څارنوالۍ د مشرتابه لومړیتوب عدالت او حقونو ته خلکو لاسرسی دی او دا لیده کاته، د دغه لومړیتوب رښتیاینې ته لاره هواروي.
