له حقیقي او حکمي اشخاصو د دولت د پورونو د حصول کمېسیون غونډه وشوه
له حقیقي او حکمي اشخاصو د دولت د پورونو د حصول کمېسیون غونډه د لويې څارنوالۍ له اداري فساد سره د مبارزې څارنوالۍ مرستیال قیس باوري په مشرۍ، د ۱۴۰۰ لمریز کال د چنګاښ پر نهمه وشوه.
په دې ناسته کې د ګلبهار سنټر، اونکس او لیګو ګلوبل شرکتونو د پورونو په تړاو معلومات د دغه ریاست د سکرټریټ له خوا وړاندې شول.
د کمېسیون غړو د کابل ښاروالۍ د ملکیتونو ریاست او عوایدو ریاست ته دنده وسپارله، چې د یادو شویو شرکتونو د پورونو په تړاو په یوه اوونۍ کې معلومات اریه کړي او د ریاستونو د نه همکارۍ په صورت کې د یادو ریاستونو د رئیسانو دندې وځنډول شي.
په دې ناسته کې پرېکړه وشوه، د یادو شویو شرکتونو د شریکانو د ممنوع الخروجۍ لیسټ ترتیب او د هدایت په موخه دې کمېسیون ته راجع شي. د دغې غونډې غړو د ښاروالي په همکارۍ د کمېسیون سکرټریټ ته دنده وسپارله چې د دغو شرکتونو د بانکي حسابونو معلومات هم راټول کړي.
د غونډې ګډونوالو پرېکړه وکړه، چې د یادو شرکتونو په اړه د زیاتو معلوماتو د ارایه کولو لپاره بلې غونډې ته د کابل ښاروالۍ د ملکیتونو رئيس هم راوغوښتل شي.
همداراز پرېکړه وشوه، د ستونزو د حل او د ماليې وزارت د ۳۳ ګڼې مصوبې د تطبیق په اړه دې د ګاز او نفتي موادو او ماليې وزارت ترمنځ یوه غونډه وشي او پایله دې يې کمېسیون ته وړاندې شي.
