لویې څارنوالۍ د نړیوالو جرمونو په تړاو د ملي امنیت له عمومي ریاست سره ناسته وکړه
د نړیوالو جرمونو پر ضد د مبارزې څارنوالۍ او د کورني او بهرني امنیت ضد څارنوالۍ رئیسانو او د ملي امنیت د عمومي ریاست د مرستیال ترمنځ د ۱۴۰۰ لمریز کال د زمري پر څلورمه غونډه وشوه.
په دې غونډه کې د نړیوالو جرمونو، د روم اساسنامې او د افغانستان غړیتوب، په نړیواله جزايي محکمه کې د افغانستان د وضعیت او تکمیلي صلاحیت او د افغانستان په جزا کوډ کې د راغلو نړیوالو جرمونو په اړه بحث وشو. همداراز په دې ناسته کې د نړیوالو جرمونو په تړاو د افغانستان په ځانګړې توګه د لویې څارنوالۍ د اجرااتو، فرصتونو او ننګونو په تړاو هم بحث شو.
په یاده شوې ناسته کې د ملي امنیت د عمومي ریاست د لومړي مرستیال د همکارۍ د جلب تر څنګ، د قرارونو د تطبیق پر څرنګوالي، د نړیوالو جرمونو د اړوندو مکاتیبو د ځواب ورکولو او د نړیوالو جرمونو د قضیو د کشفي اجرااتو په اړه هم خبرې وشوې.
د ملي امنیت د عمومي ریاست لومړي مرستیال په دې ناسته کې ژمنه وکړه، چې د دغه ریاست اړونده ټولو برخو ته به هدایت ورکوي، چې د نړیوالو جرمونو د قرارونو د تطبیق او په دې برخه کې د ننګونو د هواري په موخه به له لویې څارنوالۍ سره همکاري او لازمه همغږي ولري.
