د ۱۴۰۰ مالي کال په لومړۍ ربع کې له ښځو سره د تاوتریخوالي د ۱۴۶۴ قضیو بررسي
لویې څارنوالۍ د ۱۴۰۰ مالي کال له پيل څخه د ۱۴۰۰ لمریز کال تر غويي میاشتې پورې ۱۴۶۴ قضيې چې له مخې يې ۱۶۲۶ کسان تورن دي، بررسي کړې دي.
په دغو قضیو کې د قتل، جنسي تېري، وهل ټکول، اجباري کار او فحشا ته مجبورول، د کمیاوي او زهري موادو په استفادي اور اچول، ځانوژنې او ځانسوځونې ته اړ ایستل، جراحت، معلولیت، بدو کې ورکول، په اجباري توګه ودول، تر یوې زیاتې مېرمنې سره واده او د تعلیم، کار، میراث او روغتیايي خدماتو ته د لاسرسي له حقه د محرومولو پېښې شاملې دي.
کندهار، بلخ، ننګرهار او کابل ولایتونو په ترتیب د ۲۹۸، ۱۹۲، ۱۵۴ او ۱۳۴ قضیو په ثبتولو سره، له ښځو سره د تاوتریخوالي تر ټولو ډېرې قضيې ثبت کړې دي.
لویه څارنوالي د قانون مجري د مهم بنسټ په توګه ژمنه کوي، چې له ښځو سره د تاوتریخوالی د قربانیانو ملاتړ او له ښځو سره د تاوتریخوالي اړوند قضيې به په جدي او پرېکنده توګه ارزوي.
