د زابل د فرمانونو او حکمونو د تعقیب او نظارت ریاست کارکوونکو ته درې ورځنی روزنیز سیمینار پای ته ورسېد
د فرمانونو او حکمونو د تعقیب او نظارت لوی ریاست په مرکز او ولایتونو کې د دغې ادارې کارکوونکو د ظرفیت لوړونې په موخه د روزنیزو سیمینارونو لړۍ پیل کړې ده.
دا روزنیز پروګرام چې د زابل د فرمانونو او حکمونو تعقيب او نظارت ریاست کې جوړ شوی و، د ۱۴۴۵ هجري قمري کال د ربیع الثاني پر دویمه پای ته ورسېد. دا ډول سیمینارونه د رییسانو، مشایخو، علمای کرامو، کارپوه او تجربه لرونکو ښوونکو په شتون کې د اتو کمېټو له لوري مخته وړل کېږي.
د دې سیمینار په وروستۍ ورځ د زابل والي الحاج مولوي حزبالله افغان، د دې ولایت مرستیال والي الحاج مولوي محبالله حماس، د فرمانونو او حکمونو د تعقیب او نظارت لوی ریاست د جنوب لویدیځ زون د کمېټې رییس الحاج مفتي اظهارالحق حقاني، د جنوب لویدیځ زون تدریسي رییس مولوي حبیبالرحمن آغاجان او د دغه ولایت ګڼو نورو ولایتي مشرانو حضور درلود.
غونډه د قرانکریم په مبارکو آیتونو پیل شوه.
د دې سیمینار په وروستۍ ورځ د زابل والي د دا ډول پروګرامونو جوړول نیک اقدام وباله او د نورو ورته روزنیزو سیمینارو پر جوړولو یې ټينګار ورکړ. نوموړي د دې ولایت مسوولینو ته په اشارې وویل: «د فرمانونو او حکمونو د تعقیب او نظارت لوی ریاست سره همغږي ولرئ او پوره همکاري ورسره وکړئ.»
ورته مهال د جنوب لویدیځ زون کمېټې رییس په خپلو خبرو کې د نظام ساتنې لومړنی شرط عدالت، انصاف او له اداري فساد سره جدي مبارزه یاده کړه. نوموړي زیاته کړه: «فساد نظامونه له منځه وړي. هیله مې دا ده، چې په خپل نظام کې فساد ته اجازه ورنه کړئ او عدالت دی، چې د نظام ستنې ورباندې قوي کېږي.» د هغه په باور، د نظامونو ګټل ګران کار دی؛ خو پالل یې تر دې هم ګران دی.
د دغه سیمینار په وروستۍ ورځ د پروګرام ګډونوالو ته تصدیق پاڼې هم ورکړل شوې او یاد سیمینار په دعا ویلو پای ته ورسېد.
دا سیمینارونه د مرکز په ګډون د ولایتونو د ریاستونو او د فرمانونو او حکمونو د تعقیب او نظارت آمریتونو مسلکي غړو ته په ملکي، نظامي، استخباراتو او د ملي دفاع وزارت(قول اردوګانو او د ولایتونو فرقو) او د هېواد په کچه د ولسوالیو مسلکي غړو لپاره په پام کې نیول شوې دي.
د دې روزنیزو سیمینارونو موخه، په امارتي او له امارتي ادارو سره اړوند خصوصي ادارو کې د ا.ا.ا د مشرتابه د فرمانونو، حکمونو او هدایاتو د تعقیب او نظارت ډول او څرنګوالی، په اړوندو ادارو کې د اجرااتو د قانونیت نظارت او له امارتي او خصوصي مراجعو له مسوولینو سره د دغې ادارې د مسلکي غړو چلند او د همکارۍ څرنګوالی، د تقنیني سندونو رعایت او تطبیق، له اداري فساد څخه مخنیوی، یادو مراجعو کې د مؤثریت او روڼتیا رامنځته کول او په هېواد کې د اسلامي نظام لا بقا په ګوته شوي دي.
