سمنګان کې پر یوې قابلې د جنسي تېري د قضیې د څېړنې په موخه پلاوی ټاکل شوی
د افغانستان د اسلامي جمهوري دولت لویې څارنوالۍ دا پلاوی، د ۱۳۹۸ کال د غبرګولي پر لومړۍ د سمنګان ولایت په روی دوآب ولسوالۍ کې د ۹ مظنونو له خوا پر یوې قابلې د جنسي تېري د قضیې او دعوې د څېړنې په موخه ټاکلی دی.
دغه پلاوی د یادې قضیې د هر اړخیزې څېړنې په موخه سمنګان ته لېږل کېږي، تر څو یاده قضیه په دقت، بې پرې او هر اړخیزه توګه وڅېړي.
د دې قضیې اړوند ۹ کسان نیول شوي، چې څلور کسان یې د کم عمر له امله تر حجز لاندې دي او پنځه نور په توقیف کې دي.
دا په داسې حال کې ده، چې د سمنګان استیناف څارنوالۍ د یادې قضیې په اړه څېړنې پیل کړې دي؛ خو د لویې څارنوالۍ رهبري، د یادې قضیې د جدي او دقیقې څېړنې په برخه کې له استیناف څارنوالۍ سره د همکارۍ په موخه دغه ولایت ته پلاوی استوي.
د افغانستان د اسلامي جمهوري دولت لویه څارنوالي ډاډ ورکوي، چې یاده قضیه به د هېواد د نافذه قوانینو په رڼا کې په جدي، بې پرې، خپلواکه او هر اړخېره توګه وڅېړي او د څېړنو له بشپړاوي وروسته به سمنګان ته د استول شوي پلاوي لاسته راوړنې له هېوادوالو سره شریکې کړي.