افغانستان ته د بې کیفیته تېلو، اوبلنو ګازو او نورو نفتي موادو له واردولو د مخنیوي لپاره د مؤظف پلاوي ناسته جوړه شوه
د فرمانونو او حکمونو د تعقیب او نظارت لوی ریاست د سرپرست محترم مولوي شمسالدین شریعتي په مشرۍ ناسته د مؤظفې کمېټې د غړو په ګډون د امارتي ادارو او وزارتونو د معیننانو په حضور کې جوړه شوه.
دا پلاوی د عالیقدر امیرالمؤمنین حفظهالله تعالی د (۷۹۳/۵۶۷۱) ګڼې ۱۷/۱۰/۱۴۴۶ هـ ق نېټې فرمان پر بنسټ ګومارل شوی تر څو هېواد ته د بې کیفیته تېلو، اوبلنو ګازو او نورو نفتي موادو د واردولو مخنیوی وکړي.
په دې ناسته کې د کورنیو چارو وزارت له نشهیي توکو سره د مبارزې معین ملا عبدالحق همکار، د استخباراتو عمومي ریاست مالي او اداري مرستیال ملا بسمالله اخند، د ریاست الوزراء مقام د دفتر ریاست د ادارې او منابع مرستیال مولوي سیداحمد مستقیم او د نورو اړوند ادارو استازو ګډون کړی و.
دا غونډه د ۱۴۴۶ هجري قمري کال د ذوالعقدةالحرام پر ۱۰ چې د ۱۴۰۴ کال د غويي له ۱۸ نېټې سره برابره ده، د فرمانونو او حکمونو د تعقیب او نظارت لوی ریاست د دارالامان ودانۍ د غونډو په تالار کې وشوه.
د دې ناستې د ترسراوي موخه، د امیرالمؤمنین حفظهالله تعالی د حکمونو پلي کول او افغانستان ته د ټيټ کیفیت لرونکو تېلو، اوبلنو ګازو او نورو نفتي موادو د واردولو د مخنیوي لپاره د اړینو ګامونو پورته کول ښودل شوې ده.
غونډه د قرانکریم په څو مبارکو آیتونو پیل شوه.
د اجنډا له مخې، د ناستې په لومړۍ برخه کې د بې کیفیته تېلو، اوبلنو ګازو او نورو نفتي موادو د واردولو د مخنیوي لپاره پر حل لارو خبرې وشوې.
د پلاوي غړو د موضوع په اړه له بحث وروسته، د ستندرد کولو قانون د تدوین د ګړندي کولو پر ارزښت ټينګار وکړ.
د دې غونډې غړو له هر اړخیز بحث وروسته ټينګار وکړ چې د نورم او ستندرد ملي اداره مکلفه ده چې ژر تر ژره دې د عالیقدر امیرالمؤمنین حفظهالله تعالی د (۹) ګڼې ۲۸/۳/۱۴۴۴ هـ ق نېټې فرمان له مخې د ستندرد کولو قانون طرحه چمتو او طې مراحل کړي، تر څو د اداراتو او اشخاصو دندې او واکونه څرګند او له اړوند تقنیني سند څخه د سرغړاوي په صورت کې اړین تأدیبي او جزايي مؤیدات پلي شي.
د ناستې په وروستۍ برخه کې د مؤظف پلاوي غړو د موضوع په اړه له خبرو وروسته یادونه وکړه چې د ا.ا.ا د مشرتابه عالي مقام په جدي توګه ژمن دی، څو هېواد ته د بې کیفیته موادو او محصولاتو په ځانګړي توګه د تېلو، اوبلنو ګازو او نورو بې کیفیته نفتي موادو مخنیوی وکړي او د هېوادوالو روغتیا او ملي ګټې لومړیتوب وګرځوي.
ناسته د افغانانو د هوساینې او سوکالۍ په دعا پای ته ورسېده.
د یادونې ده چې له دې وړاندې د عالیقدر امیرالمؤمنین حفظهالله تعالی د حکم او د ا.ا.ا د کابینې د مصوبې پر بنسټ د فرمانونو او حکمونو د تعقیب او نظارت لوی ریاست د سرپرست محترم مولوي شمسالدین شریعتي په مشرۍ پلاوی چې د نورو امارتي ادارو استازي یې غړي دي، د بې کیفیته تېلو د واردولو د مخنیوي لپاره ناسته کړې وه. پلاوي د هېواد د بندرونو له هر اړخیزې لیدنې او ارزونې وروسته خپل راپور له پیشنهادي طرحې سره یو ځای د ا.ا.ا کابینې ته وړاندې کړ چې کابینې تصویب کړ. دغه راز عالیقدر امیرالمؤمنین حفظهالله تعالی د کابینې مصوبه او د پلاوي په راپور کې راغلي وړاندیزونه تایید کړل چې له مخې یې افغانستان ته د بې کیفته تېلو، اوبلنو ګازو او نورو نفتي موادو پر واردولو بندیز ولګېد.
