الحاج مولوي شاه محمد شاهد د لویې څارنوالۍ د سرپرست په توګه معرفي شو
د نوموړي د معرفي غونډه نن شنبه د ۱۴۰۰ کال د مرغومي پر څلورمه وشوه.
په دې غونډه کې د افغانستان اسلامي امارت د چارو ادارې استازي مولوي عبدالباقي منصور، شیح الحدیث عبدالحمید حماسي، ځینو رئیسانو او کارکوونکو ګډون درلود.
د غونډې په پيل کې د چارو ادارې استازي مولوي عبدالباقي منصور ګډونوالو ته د لويې څارنوالۍ د سرپرست او مالي او اداري چارو مرستیال د ریاست الوزرا حکم ابلاغ کړ. ښاغلي منصور وویل، چې د هر نظام ستنې پر اداري سیسټم ولاړې دي او هر نظام که پرمختګ غواړي، باید د اداري سیسټم د پياوړتیا لپاره هڅې وکړي.
هغه وویل، موږ او تاسې ټولو ته پکار ده، چې د دې مظلوم ملت او افغانستان خدمت په سمه توګه وکړو.
ورته مهال د لويې څارنوالۍ سرپرست او د دغې ادارې مالي او اداري چارو مرستیال الحاج مولوي شاه محمد شاهد لویه څارنوالي د افغانستان اسلامي امارت په چوکاټ کې یوه مهمه اداره وبلله او دا اداره يې د تحقیق او په شرعي محکمه کې د دعوا د اقامې تر څنګ د شرعیت او قانون د یوشان پلي کېدلو بنسټیزه مرجع یاده کړه.
ښاغلي شاهد ډاډ ورکړ، چې لویه څارنوالي به د ملت پر وړاندې مسووله او د اسلامي شریعت او قوانینو په اړه یوه بې طرفه اداره وي. نوموړي ژمنه وکړه، چې دا اداره به په خپلواکه توګه اجراات کوي.
مولوي شاه محمد شاهد زیاته کړه: «اسلامي شریعت او قوانین به پر ټولو یوشان پلی کېږي او په دې برخه کې هېڅ ډول استثنا نشته.»
د لویې څارنوالۍ سرپرست د دغې ادارې له ټولو پخوانیو متخصصو، کارپوه او پاک نفسه کارکوونکو څخه غواړي، چې دندو ته حاضر او د اسلامي امارت تر چتر لاندې خپل وطن ته د خدمت جوګه شي.
همداراز په دې غونډه کې شیخ الحدیث مولوي عبدالحمید حماسي د دغې ادارې له ټولو کارکوونکو غوښتنه وکړه، چې نظام کې د اصلاحاتو او خلکو ته د خدمت کولو په موخه لاس یو کړي. هغه دا د ټولو ګډ مسوولیت وګاڼه، چې له ظالمه د مظلوم حق واخلي.
دا غونډه په هېواد کې د تلپاتې ارامتیا په دعايې پای ته ورسېده.
