دوه کسان د پیسو مینځلو په تور محاکمه شول
د اداري فساد له لویو جرمونو سره د مبارزې عدلي او قضایي مرکز ابتدایي محکمې، دوه کسان د پیسو مینځلو په تور د ۱۳۹۷ کال د سلواغې پر اتمه په علني ډول محاکمه کړل.
په دغه قضایي ناسته کې، د عزیز نیازي لمتید شرکت رئیس او صراف عزیزالرحمن د ګل الرحمن زوی او د بلال احمد مجیب لمتید شرکت رئیس او صراف او همداراز د عزیز نیازي لمتید شرکت مرستیال نذیر احمد د ګل الرحمن زوی ، محاکمه شول.
د دغه قضایي ناستې پلاوي، یاد شوې تورن کسان د پیسو مینځلو په تور، د جزایي اجرااتو قانون د ۲۳۷ او د جزا کود د ۱۷، ۵۷ او ۴۹۸ مادې په رعایتونې، د پیسو مینځلو د مخنیوي قانون د ۵۲ مادې لومړۍ فقرې له مخې هر یو په څلور څلور کاله تنفیذي بند او د پنځوس زره افغانیو په ورکړې محکوم او مجازات کړل.
د دغه ناستې د قضایي پلاوي د پرېکړې پر بنسټ، ۱۰۲ میلیونه و ۱۴۴ زره او ۹۹۶ امریکایي ډالر، د ناشي عوایدو او پیسو مینځلو د مخنیوي قانون د ۳۹ مادې درېیمې فقرې او د جزا کود د ۵۰۹ مادې درېیمې فقرې له مخې مصادره شول.
د یادې شوې ناستې رئیس همداراز د کورنیو بانکونو د کارکوونکو په اړه، چې په یاده شوې قضیه کې یې د تزویزي انوایسونو له مخې اجراات کړي، حکم صادر کړ.
