دوه کسان د پېسو مینځلو په تور په علني ډول محاکمه شول
دوه کسان د اداري فساد له لویو جرمونو سره د مبارزې عدلي او قضایي مرکز ابتدایه محکمې له خوا د پېسو مینځلو په تور د ۱۳۹۷ کال د چنګاښ پر ۱۹ په علني ډول محاکمه شول.
په دغې قضایي ناسته کې، عزت الله صراف او د هغه شاګرد نور حبیب محاکمه شول.
د دغې قضایي ناستې پلاوي، نوموړي کسان د ۷۵۰۰۰ سعودي ریال د ناقانونه واردې په تور، د جزا کود د ۵۰۵ مادې لومړۍ فقرې او د یاد شوي قانون د ۱۷ مادې لومړۍ فقرې او ۵۷ مادې په رعایتولو سره او همداراز د جزایي اجرااتو قانون د ۲۳۷ مادې لومړۍ فقرې له مخې هر یو په اووه- اووه میاشتو تنفیذي بند محکوم کړل. همدارنګه د یادې ناستې قضایي پلاوې د پرېکړې پر اساس، دغه پېسې له دوی څخه مصادره او د دولت خزانې ته واستول شوې.
د یادې شوې قضايي ناستې رئیس وویل، چې دا پرېکړه پرېکنده نه ده، تورن کسان د نېوکې په لرلو سره د استیناف غوښتنې حق لري.
