دوه کسان له افغانستانه متحده عربي اماراتو ته د ۴۱.۳۷۵ کیلوګرامه طلا د قاچاق په تور بريالذمه وپېژندل شول
بشیراحمد صدیقي د نصیراحمد زوی او محمدرفیع بها د غلامبهاالدین زوی چې په مخکېني حکومت کې د ۴۱.۳۷۵ کیلوګرامه سرو زرو (طلا) د قاچاق په تور محکوم شوي وو، د ا.ا.ا سترې محکمې له خوا بريالذمه وپېژندل شول.
محمدرفیع بها او بشیراحمد صدیقي د ۱۳۹۶ کال د زمري پر ۱۳مه د امریکا استخباراتي ګروپ (سیګار) له خوا په بګرام هوايي ډګر کې متحده عربي اماراتو (دوبۍ) ته د نهه شمشه سرو زرو خښتو د لېږد پر مهال ونیول شول او نسبتي دوسیه یې د مخکېني حکومت له لویو جرمونو سره د مبارزې عدلي او قضايي مرکز ابتدايي محکمې ته ولېږل شوه.
نوموړي مرکز د ۱۳۹۸ کال د تلې پر ۳۰مه یاد کسان په څلور کاله تنفیذي بند او د سل – سل زره افغانۍ په ورکړې او دغه راز د ۴۱.۳۷۵ کیلوګرامه سرو زرو پر مصادرې محکوم کړي وو.
د ا.ا.ا له بریا وروسته یاده قضیه د ریاست الوزراء عالي مقام او سلسلتاً لوی څارنوالۍ، د کابل مرافعه محکمې او په پاېله کې یې دوسیه د سترې محکمې دارالافتاء محکمې ریاست ته ولېږل شوه او نوموړې محکمې د ۵۰۳ شمېرې د ۴/۱۱/۱۴۴۴ نېټې په فتوا کې د ۴۱.۳۷۵ کیلوګرامه طلا په استراداد حکم وکړ او دغه راز محمدرفیع بها د غلامبهاالدین زوی او بشیراحمد صدیقي د نصیراحمد زوی ممنوعالخروجي او دخولي یې رفع او هغوی یې بريالذمه وګڼل.
