د افغانستان اسلامي جمهوري دولت لویې څارنوالۍ رهبرۍ د ډاډګیرنې پیغام

بِسْمِ اللّٰهِ الرَّحْمٰنِ الرَّحِيمِ

وَ بَشِّرِ الصَّابِرينَ أَلَّذينَ إِذا أَصابَتْهُمْ مُصيبَةٌ قالُوا إِنَّا لِلَّهِ وَ إِنَّا إِلَيْهِ راجِعُونَ

په ډېره خواشینۍ سره مو خبر تر لاسه کړ، چې نن شنبې ورځ، سهار ۸:۳۰ بجې د ۱۳۹۸/۸/۲۵، د دولت وسله والو مخالفینو، د کابل قرباغ ولسوالۍ سیاه سنګ کلي کې د کابل – پروان په عمومي سړک، د باګرام عدلي مرکز د محبس څارنوالانو هر یو ښاغلی روح الله ارزګاني، نجیب الله سهاک، مرتضی احمدي، فیروز عیاني او د یاد ریاست د اداري مدیر قیس پر موټر چې دندو ته روان و، برید کړی، چې له امله یې څارنوال فیروز عیاني په شهادت رسېدلی او پاتې نور ټپیان دي. ټپیان د کابل ولایت د ملي امنیت روغتون ته لېږدول شوي، چې له دې ډلې څارنوال نجیب الله سهاک د سخت ټپ له امله په روغتون کې ساه ورکوي.

د افغانستان د اسلامي جمهوري دولت د لویې څارنوالۍ رهبري، د دغه دردوونکې او غموونکې پېښې په اړه د شهیدانو کورنیو، خپلوانو او د هېواد شریفو او متدینو خلکو ته د تسلیت مراتب وړاندې کوي. خدای بخښلو ته د لوی خدای له دربار څخه د مغفرت دعا کوي، کورنیو او دوستانو ته یې د جمیل صبر هیله او ټپیانو ته د لوی خدای له دربار څخه د عاجلې او بشپړې روغتیا غوښتنه کوي.

د افغانستان د اسلامي جمهوري دولت لویه څارنوالي یو ځل بیا ټينګار کوي، چې دا ډول ظالمانه کړنې د عدالت د تأمین او د قانون د حاکمیت په برخه کې د دغې ادارې په پرېکنده اراده کې آن یو کوچینی خنډ هم نشي جوړولای. د لویې څارنوالۍ کارکوونکي، په هر ډول شرایطو کې په ټینګ عزم او هوډ سره د افغانستان د عزتمندو او شریفو خلکو خدمت ته چمتو دي.

د لویې څارنوالۍ رهبري د ورته انسانیت او شریعت خلافه حملو د غندنې تر څنګ، د یادې پېښې د عاملینو د نیونې په موخه د لویې څارنوالۍ او کشفي او امنیتي ادارو مسؤولانو ته هدایت ورکړی، څو د یادې قضیې عاملین وپېژني او د قانون منګولو ته یې وسپاري. اوسمهال یاده موضوع تر جدي څېړنو لاندې ده.

په درناوي

د افغانستان د اسلامي جمهوري دولت د لویې څارنوالۍ رهبري

۱۳۹۸ کال د لړم ۲۵، کابل- افغانستان