د افغانستان درې رنګه بیرغ؛ د افغانانو رښتینی سمبول دی
د لويې څارنوالۍ سرپرست محترم ذبیح الله کلیم د زمري د اوومې، د افغانستان د ملي بیرغ ورځ، د نمانځنې په غونډه کې وویل، چې د افغانستان درې رنګه بیرغ د افغانانو هویت دی او بیرغ د هېوادونو د تاریخ په بهیر کې د رښتیني سمبول په توګه پېژندل کېږي.
د ملي بیرغ ورځې د نمانځنې دا غونډه نن د ۱۴۰۰ لمریز کال د زمري پر اوومه د دغې ادارې د مرستیالانو، رئیسانو او ځینو نورو کارکوونکو په ګډون وشوه.
ښاغلي کلیم د افغانستان خلکو په ځانګړې توګه دفاعي او امنیتي ځواکونو ته د دغې ورځې مبارکي وویله او زیاته يې کړه: «همدا اوس دفاعي او امنیتي ځواکونه په سنګرونو او لومړۍ کرښه کې د ازادۍ، امنیت، برابرۍ او عدالت لپاره جنګېږي او په خپلو وینو تر همدغه درې رنګه بیرغ لاندې، د هېواد او خلکو د واقعي ارزښتونو دفاع کوي.»
د ښاغلي کلیم په وینا، د ملتونو، سیاسي نظامونو او اداري جوړښتونو ګډ هویت د بیرغ په نامه په یوه سمبول کې خلاصه کېږي. د نوموړي په وینا، بیرغ د ملي نښان په توګه، ټول ملیتونه، اقلیتونه او ډلې، د ملت په نامه د یوه مفهوم تر چتر لاندې راټول او د ملت د یوه ارزښتناک عنصر په توګه يې یو له بل سره نښلوي.
د لویې څارنوالۍ سرپرست، د افغانستان د درې رنګه بیرغ ارزښت مهم وباله او زیاته یې کړه: «په اوسنیو شرایطو کې افغان دفاعي او امنیتي زړور ځواکونه په لومړۍ کرښه کې د دغه بیرغ د هسک ساتلو په موخه جنګېږي، شهیدانېږي او خپل ځان د دغه بیرغ د هویت لپاره ځاروي، له دې څخه د دغه بیرغ رښتینی ارزښت په ډاګه کېږي.»
د ښاغلي کلیم په وینا، موږ به جنګي شرایطو کې ژوند کوو او هره ورځ دا جنګ له موږه بې شمېره قربانۍ اخلي؛ خو بیا هم د عدالت د تأمین، د قانون د حاکمیت او د ګټورو عدلي خدماتو د وړاندې کولو په برخه کې زموږ مبارزه نه کمزورې کوي. نوموړي وویل، موږ تل کوښښ کوو، چې تر دغه بیرغ لاندې عدالت تأمین او قانون یوشان پلی کړو او په دې برخه کې خپل رسالت ترسره او د قانون د یوشان تطبیق او له تبعیض سره د مبارزې په برخه کې د افغانانو د یووالي او وحدت لپاره مرسته وکړو.
د یادونې وړ ده، چې نن د ولایتونو استنیاف څارنوالیو کې هم د ملي بیرغ ورځ ونمانځل شوه.
