د بلخ پخوانی ښاروال د اختلاس په تور پر یو کال او شپږ میاشتو تنفیذي حبس او د پنځو میلیونو افغانیو د ورکړې پر مجازاتو محکوم شو
د بلخ پخوانی ښاروال محمد نصیر عیني د عین الدین زوی اصلي تورن او نوران شاه د احمدشاه زوی د پنځو میلیونو افغانیو په اختلاس کې د همکارۍ په تور د اداري فساد له لویو جرمونو سره د مبارزې عدلي او قضايي مرکز له خوا محاکمه شول.
د قضيې موظف څارنوال د اسنادو او شواهدو له راټولو وروسته له محکمې څخه نوموړو ته د الزام د اووه دلایلو په راوړلو سره د مجازاتو غوښتنه وکړه.
د موظف څارنوال په صورت دعوا کې راغلي، چې د بلخ پخواني ښاروال یو کيلي (له ګمرکي او ترافيکی اسنادو پرته) لنډکروزر موټر د تدارکاتي اسنادو له طی مراحل پرته په پنځو میلیونو افغانیو اخیستی دی.
د څارنوال د صورت دعوا پر اساس، د بلخ پخواني ښاروال سره له دې چې دا موټر یو میلیون او ۲۰۰ زره د بازار له بيې څخه په لوړې بيې اخیستی، د وزیرانو شورا د ۱۳۹۶ کال ۱۳ او ۱۴ شمېرې مصوبه او د تدارکاتو د طرزالعمل ۳۶ ماده هم نقض کړې ده.
د اداري فساد له لویو جرمونو سره د مبارزې عدلي او قضايي مرکز ابتداییه محکمې قضايي پلاوي د تورنو او مدافع وکیلانو په حضور کې، د بلخ پخوانی ښاروال محمد نصیر د اختلاس او حیف او میل په تور پر یو کال او شپږو میاشتو تنفیذي حبس او د پنځو میلیونو افغانیو د خسارې پر جبران محکوم کړ.
دې قضايي ناستې د بلخ ښاروالۍ د مالي محاسبې مدیر نوران شاه بري الذمه او د بلخ د پخواني والي محمد اسحق رهګذر، د دغه ولایت د مالي او اداري آمر، جان محمد او د ذبیح الله د عدلي تعقیب حکم صادر کړ.
