د بودیجې لګونې پر اجرااتو د نظارت د څرنګوالي په موخه ناسته وشوه
دغې ناسته کې د لوی څارنوال د مالي او اداري چارو مرستیال وحیدالدین ارغون، د مالي او اداري چارو، اطلاعاتو او عامه اړیکو، ګمارنې، جنډر او معلوماتي تکنالوژۍ ریاست رئیسانو او د مالي او اداري چارو ځينو کارکوونکو ګډون کړی و. دا ناسته د ۱۳۹۸ کال د مرغومي پر ۱۱ د مالي او اداري چارو مرستیالۍ د ناستو تالار کې ترسره شوه.
د لوی څارنوال د مالي او اداري چارو مرستیال وحیدالدین ارغون په دغه پروګرام کې د بویجې لګونې پر اجرااتو د نظارت په موخه پر منظمو ناستو ټینګار وکړ او ویې ویل: «د بودیجې د اجرااتو کتنه او ارزونه د هغې د لګونې د ښه تطبیق او ګټورتوب سبب کېږي.» د ښاغلي ارغون په خبره، لویې څارنوالۍ په ۱۳۹۸ کال کې خپله ۹۶ سلنه پراختیايي او ۹۹ سلنه عادي بویجه لګولې ده.
نوموړي د خپلو خبرو په دوام سره د یادې ادارې د بېلابېلو برخو ترمنځ پر همکارۍ او همغږۍ ټينګار وکړ او د ورته ناستو موخه یې د بودیجې لګونې پر اجرااتو نظارت او په دې برخه کې د شته ستونزو له منځه وړل وبلل.
دغې ناسته کې د مسلکي، عسکري، کورني او بهرني امنیت، نشه یي توکو او د اداري فساد له لویو جرمونو سره د مبارزې عدلي او قضايی مرکز او ولایتي استیناف څارنوالیو مسؤولانو د ۱۳۹۸ مالي کال د اجرااتو راپورونه وړاندې کړل. له دې ډلې په لسو ولایتونو کې سل سلنه بویجه لګول شوې او ډېری نورو استیناف څارنوالیو له ۹۳ تر ۹۹ سلنه بویجه لګولې ده.
په دغې ناسته کې، په مرکز او ولایتونو کې د پراختیايي پروژو د تطبیق په اړه خبرې وشوې او د بودیجې د تطبیق برخه کې پر اغیزمنتوب او روڼتیا ټينګار وشو. یادو مسؤولانو په دې برخه کې شته ستونزې او ننګونې په ګوته کړې او په تړوا یې مناسبو حلارو ته هم اشاره وکړه.
