د جوزجان د معلولیت د تثبیت کمیسیون رئیس ونیول شو
د اداري فساد د تورنو د نیولو په لړ کې د جوزجان د عامې روغتیا د عدلي طب عمومي مدیر چې د معلولیت د تثبیت کمیسیون ریاست یې هم کاوه، د ۱۱ زرو افغانیو بډو اخیستو په تور په بالفعل او مستند ډول د لویې څارنوالۍ او ملي امنیت له خوا په ګډه ونیول شو، چې اوسمهال په توقیف کې دی.
نوموړی د ۱۱ زرو افغانیو رشوت اخیستو پر مهال د ۱۳۹۹ لمریز کال د سلواغې پر ۱۵ د کشفي نهادونو له لورې، د لویې څارنوالۍ د استازي په شتون کې د شبرغان ښار د سرپل بندر کې په خپل شخصي کتنځای کې ونیول شو. د نوموړي تور د معلولیت اسنادو د تائیدی او طی مراحلو په موخه رشوت اخیستل بلل شوي دي.
د افغانستان اسلامي جمهوري دولت لویه څارنوالي له اداري فساد سره د مبارزې برخه کې متعهده ده. ټولې قضیې په بې پرې او ازاده توګه د اسنادو، مدارکو او شواهدو پر بنسټ د نافذه قوانینو په رڼا کې څېړي. د اداري فساد تورنو قضیې د لویې څارنوالۍ له خوا څېړل کېږي او د تحقیقاتو پایلې یې له رسنیو او افغانانو سره شریک کېږي.
د یادولو وړ ده، چې پرون د مشرانو جرګې درې سناتوران هر یو په لس کاله او یوه میاشت تنیفذي بند محکوم شول.
