د صکوکو مطبعې یو کارکوونکی د ۱۸۰ زره افغانیو پر ورکړې په مجازاتو محکوم شو
د صکوکو مطبعې یو کارکوونکی د ۱۸۰ زره افغانیو پر ورکړې په مجازاتو محکوم شو
خلیل الله سیفي د مالیې وزارت د صکوکو مطبعې د تدارکاتو د تهیې مدیر، د ۱۳۹۹ لمریز کال د لیندۍ پر اتمه له لویو جرمونو سره د مبارزې عدلي او قضایي مرکز له لوري محاکمه شو.
د تورن نسبتي دوسیه په درېيو مواردو کې له وظیفوي واک څخه د ناوړه ګټه اخیستنې په تور د عدالت د تأمین په موخه تر عدلي څار لاندې راغلې ده. تورن کس د کار او ټولنیزو چارو وزارت د بشري قوا عمومي ریاست د اړتیا وړ ۶۶۷ زره د بهرنیو اتباعو د کار جوازونه هر یو په ۲۹ افغانیو په احمدي مطبعې چاپ کړي دي. له دغې مطبعې په ۱۳۸۹ لمریز کال کې قرارداد شوی او د کار جوازونه په ۱۳۹۵ کې چاپ شوي دي.
له لویو جرمونو سره د مبارزې د عدلي او قضایي مرکز له تحقیق وروسته په ډاګه کېږي، چې د بهرنیو اتباعو د جواز کار یو کارت په ۱٫۲۳ افغانیو چاپ کېږي. همدارنګه له تحقیقاتو وروسته په ډاګه کېږي، چې د صکوکو مطبعې ریاست په دوو پړاوونو کې د ۲۵۰ زره او ۵۰۰ قطعې د کار جوازونه له تدارکاتي مرحلو پرته د ۱۳۸۹ کال قرارداد پر بنسټ په ۲۹ افغانیو د احمدي مطبعې له خوا چاپ کړي دي.
د قضیې مؤظف څارنوال د تحقیق له بشپړولو او د اتهامنامې او صورت دعوا له ترتیبولو وروسته د اسنادو او مدارکو پر بنسټ تورن ته د قانون پر اساس له ابتدایې محکمې څخه د مجازاتو غوښتنه کړې وه.
له لویو جرمونو سره د مبارزې عدلي او قضایي پلاوي، په خپله علني ناسته کې د تورن او د هغه د مدافع وکیل د دفاعیې اورېدلو وروسته، خلیل الله سیفي له دندې د ناوړه ګټې اخیستنې په درییو موردو کې د شراکت په تور، د جزا کوډ د ۴۰۳ او ۱۴۱ مادو او د یاد کوډ د ۱۷ مادې د لومړي بند دویمې فقرې، د ۲۱۵ مادې د څلورمې فقرې او ۷۸ مادې په نظر کې نیولو سره او د ۱۸۰ زرو افغانیو په ورکړې په مجازاتو محکوم کړ.
د یادولو ده، چې خلیل الله سیفي د مالیې وزارت د صکوکو مطبعې د تهیه او تدارکاتو مدیر، د ۱۳۹۹ لمریز کال د سلواغې پر دویمه له لویو جرمونو سره د مبارزې عدلي او قضایې ابتداییه محکمې له خوا په غیابي توګه په درېیو کالو او درېیو میاشتو تنفیذي حبس محکوم شوی و.
