د لويې څارنوالۍ عالي شورا غونډه وشوه
د لويې څارنوالۍ عالي شورا غونډه د قضايي تعقیب په چارو کې د لویې څارنوالۍ مرستیال ډاکټر غلام حیدر علامه په ریاست د ۱۴۰۰ لمریز کال د غويي میاشتې پر ۱۲ ترسره شوه.
د دغې غونډې په لومړۍ برخه کې د څارنوالانو د ذاتي چارو مقرره د بشري سرچینو د پراختیا د عمومي رئیس له خوا غونډې ته وړاندې شوه.
د عالي شورا غړو د موضوع تر غور او بررسي وروسته مالي او اداري، بشري سرچینو، تدقیق او مطالعاتو او د ښځو د ملاتړ رئیسانو ته دنده وسپارله، چې تر دوو اوونیو خپل اصلاحي نظریات د موضوع په تړاو چمتو او د عالي شورا راروانې غونډې ته يې وړاندې کړي.
د غونډې په دویمه برخه کې د کنټرول او مراقبت څارنوالۍ عمومي ریاست د وظایفو او واکونو د مقررې مسوده د دغه ریاست له خوا وړاندې شوه.
په دې غونډه کې د یادې شوې موضوع په تړاو تر بحث وروسته د کنټرول او مراقبت څارنوالۍ او تدقیق او مطالعاتو رئیسانو ته دنده وسپارل شوه، چې د مقررې د متن په اړه یو ځل بیا غور وکړي او راروانې غونډې ته يې ارایه کړي.
دا غونډه په دعاییې او په هېواد کې د سوکالۍ او ارامتیا په غوښتلو سره پای ته ورسېده.
