د لویو جرمونو پر ضد د مبارزې عدلي او قضايي مرکز او د بشري سرچینو د پراختیا رئیسان معرفي شول
د افغانستان اسلامي جمهوري دولت د مقام د حکم پر اساس محمد ظریف ستانکزی د فضل سلطان ساپي پر ځای د اداري فساد د لویو جرمونو پر ضد د مبارزې عدلي او قضايي مرکز د عمومي رئیس او محمد نواب احمدزی د محمد ناصر همت پر ځای د لویې څارنوالي د بشري سرچینو د پراختیا د عمومي رئیس په توګه وګومارل شول.
د یادو شویو کسانو د معرفۍ په موخه د ۱۴۰۰ لمریز کال د وري پر اوومه د لویې څارنوالۍ د عالي شورا په تالار کې د دغې ادارې د قضايي تعقیب مرستیال ډاکټر غلام حیدر علامه او ځینو نورو رئیسانو په ګډون غونډه ترسره شوه.
ښاغلي علامه په دې غونډه کې ښاغلي ستانکزي او احمدزي ته د نوې دندې د مبارکۍ تر څنګ نوموړو ته د بریا هیله وکړه.
په ورته وخت کې د بشري سرچینو د پراختیا نوي عمومي رئیس محمد نواب احمدزي د لویې څارنوالۍ د رهبرۍ او د افغانستان اسلامي جمهوري دولت د جمهور رئیس د باور مننه وکړه. نوموړي زیاته کړه، چې په یوې نوې انګېزې، ژمنتیا او پراخ لیدلوري به په دې اداره کې د کادرونو د ګومارنې لپاره هڅه کوي.
بلخوا د اداري فساد پر ضد د مبارزې عدلي او قضايي مرکز نوي رئیس محمد ظریف ستانکزي د جلالتماب جمهور رئيس او د افغانستان اسلامي جمهوري دولت لویې څارنوالۍ د رهبرۍ د باور مننه وکړه او ويې ویل، چې له دې فرصته به د اداري فساد پر ضد د مبارزې او د اداري فساد د کمولو په برخه کې په ښه توګه استفاده وکړي.
