د لویې څارنوالۍ او د ځېنو وزارتونو او خپلواکو دولتي ادارو تر منځ د همغږۍ دویمه ناسته وشوه
په یاده ناسته کې د لویې څارنوالۍ د ښځو پر ضد د تاوتریخوالي او د ماشومانو د سرغړونو د مخنیوي مرستیالې آغلې سینا شنا منصور، د یادې مرستیالۍ ځینو کارکوونکو، د وزارتونو او خپلواکو ادارو (د جمهوري ریاست د دویمې مرستیالۍ، د کرهنې او اوبو لګونې، معلوماتي تکنالوژۍ او معلوماتو، اوبو او برېښنا، پوهنې او په پارلماني چارو کې د دولت وزارت او همداراز د اساسي قانون پر تطبیق د څار خپلواک کمېسیون) د جنډر مسؤولانو ګډون کړی و.
دغه ناسته د حقونو د پراختیا نړیوال سازمان( (IDLOپه همکارۍ ۱۳۹۸ کال د وري پر ۲۸ د لویې څارنوالۍ د ښځو پر ضد د تاوتریخوالي او د ماشومانو د سرغړونو د مخنیوي مرستیالۍ په تالار کې وشوه.
د ښځو پر ضد د تاوتریخوالي او د ماشومانو د سرغړونو د مخنیوي چارو کې د لويې څارنوالۍ مرستیالې آغلې سینا شنا منصور له یادې ادارې سره د وزارتونو او خپلواکو ادارو د جنډر څانګو پر همغږۍ ټینګار وکړ او ویې ویل: «لویه څارنوالي هغه جرمونه چې د ښځو پر ضد کېږي، په دقیقه او بې پرې توګه څېړي.» د نوموړې په خبره د ښځو د ځورونې او اذیت د مخنیوي قانون کولای شي، په دې برخه کې شته ستونزي حل کړي.
په ورته مهال کې، د لویې څارنوالۍ د ښځو پر ضد د تاوتریخوالي او د ماشومانو د سرغړونو د مخنیوي څارنوالۍ مشاور عبدالحمید صمدي، د لویې څارنوالۍ او د نورو دولتي ادارو د جنډر څانګو تر منځ د همغږۍ رامنځ ته کول د یادې ناستې موخه وبلله. د نوموړي په خبره، لویه څارنوالي په پام کې لري، چې په نږدې راتلونکو کې د جنډر په اړه د عامه پوهاوي پروګرامونه په ټولو وزارتونو او دولتي خپلواکو ادارو کې جوړ کړي.
له بلې خوا د دولتي ادارو د جنډر مسؤولانو یاده ناسته مهمه وبلله او په ادارو کې یې د ورته پروګرامونو جوړول د ښځو پر ضد د تاوتریخوالي د کچې کمولو او د خوندي کاري چاپېریال د رامنځته کولو په برخه کې اغېزناک وبلل.
دا په داسې حال کې ده، چې لویې څارنوالۍ څه موده ضد هم له ځینو وزارتونو او خپلواکو دولتي ادارو سره د همغږۍ ناسته کړې وه.
