د لویې څارنوالۍ سرپرست د نویو رئيسانو د معرفۍ په غونډه کې له اداري فساد سره پر مبارزې ټینګار وکړ
د لویې څارنوالۍ د نویو رئيسانو د معرفۍ غونډه چې د ۱۴۰۰ لمریز کال د چنګاښ پر ۱۳ وشوه، د لویې څارنوالۍ سرپرست دغو رئیسانو او کارپوهانو ته د مبارکۍ او بریا تر څنګ، وویل: «موږ هغه وخت عدالت په ښه توګه تأمینولی شو، چې کار اهل کار ته وسپارو.» ښاغلي کلیم زیاته کړه، د لويې څارنوالۍ یو مکلفیت له اداري فساد سره مبارزه ده. د نوموړي په وینا، اداري فساد د ادارو او هېواد د پرمختګ د مخنیوي سبب کېږي.
د لویې څارنوالۍ سرپرست له نویو ګومارل شویو افرادو وغوښتل، چې د دندې د اجرا پر مهال باید دیني، اخلاقي او سازماني ارزښتونو او د هېوادوالو حقونو ته پام وکړي او همداراز د مراجعانو غوښتنو ته درناوی، له ښځو سره د تاوتریخوالي پر ضد مبارزه او قانونمند اجراات هم له پامه ونه غورځوي.
د لویې څارنوالۍ په وړاندیز او د جمهوري ریاست عالي مقام په منظورۍ، وحیدالله زاهد د جمهوري ریاست عالي مقام او د لویې څارنوالۍ د احکامو او هدایاتو د تعقیب رئيس، محمد آصف فیاض د غزني استیناف څارنوالۍ رئيس او احمد شهاب شکوهمند د لویې څارنوالۍ د مقام دفتر عمومي ریاست د اسنادو او اړیکو رئيس په توګه وګومارل شول.
همداراز عزیزالرحمن د اسنادو د ارزونې مسلکي کارپوه، میر احمد فایز د احکامو او هدایاتو د تعقیب مسلکي کارپوه، حبیب الرحمن د افغانستان اسلامي جمهوري ریاست مقام او د لویې څارنوالۍ د احکامو او هدایاتو د تعقیب مسلکي کارپوه، حیده پروانه د اسنادو د ارزونې کارپوه او اجمل د اسنادو د ارزونې د مسلکي کارپوه په توګه معرفي شول.
په دې غونډه کې نویو ګومارل شویو رئیسانو او کارپوهانو د لویې څارنوالۍ د مشرتابه د باور مننه وکړه او ژمنه یې وکړه، چې خپل اجراات به په صادقانه، خپلواکه او بې پرې توګه د قانون په رڼا کې ترسروي او د اداري فساد پر ضد به خپله مبارزه روانه ساتي.
