د لویې څارنوالۍ مرکزي ریاستونو خدماتي کارکوونکي د سواد زده کړي کورس ته معرفی شول
د روان کال غویی میاشتې په شپاړسمه نیټه د شنبې په ورځ د سواد زده کړې پروګرام د ملکي خدمتونو کارکوونکو لپاره په عملی بڼه پېل شو. د دې پروګرام د پرانستلو په مراسمو کې د لوی څارنوالۍ مالي او اداري مرستیال ښاغلي وحید الدین ارغون، د بشري منابعو مشرانو، مالي او اداري مشرانو، ښځو پر وړاندې د تاوتریخوالي څارنوالي او د لوی څارنوالۍ جندر پروګرام هم ګدون کړی وو.
د لوی څارنوالي مالي او اداري مرستیال، د سواد د زده کړې پروګرام پېل پدې اداره کې د وړتیا د لوړوالي په برخه کې یو مهم ګام وباله. د نوموړي په وینا، له دې وروسته به د ملکي خدماتو د کارکوونکو ګمارلو لپاره لومړني زده کړې د معیار په توګه وټاکل شي. نوموړي زیاته کړه:" په راتلونکي کې به دا پروګرام په ولایاتو کې هم پېل شي. کارکوونکي باید د ورځنیزو چارو تر څنګ د سواد زده کړې په خاطرهم هڅې وکړي.
د ښاغلي ارغون په وینا، د بشري منابع ریاست ته دنده ورکړل شوې ده تر څو د ملکي خدمتونو هغه کارکوونکي چې لومړنۍ زده کړې نلري د هغوي بشپړ فهرست په مرکز او ولایاتو کې چمتو کړي ترڅو د پورته ذکرشویو کارکوونکو لپاره هم د سواد د زده کړې پروګرام پېل شي.
محمد داوود افضلی د بشري منابعو مشر، د کارکوونکو د وړتیا لوړوالی د دې ریاست د مسؤلیتونو څخه وباله. د نوموړي په وینا، د سواد د زده کړې د بهیر نه به په جدي توګه څارنه وشي.
د لومړي ځل لپاره د لوی څارنوالي د ملکي خدمتونو د کارکوونکو لپاره د سواد د زده کړې پروګرام پېل شو.
