د لویې څارنوالۍ کارکوونکو ته "د افغانستان د دوامداره پرمختګ د موخو" په اړه د عامه پوهاوي پروګرام جوړ شو
دا پروګرام د لویې څارنوالۍ د پلان او بهرنیو اړیکو د رئیس رحیم الله صافي، د اجرائیه ریاست، اقتصاد وزارت، (UNDP) دفتر د مسؤولینو او د لویې څارنوالۍ د ځینو کارکوونکو په ګډون د ۱۳۹۸ کال د وري پر شپږمه د یادې شوې ادارې د مسلکي زده کړو انستېتیوت په تالار کې جوړ شو.
د لویې څارنوالۍ د پلان او بهرنیو اړیکو رئیس ښاغلي رحیم الله صافي په دغه پروګرام کې وویل، چې د افغانستان دولت پر ملي ژمنو سربېره، نړیوالې ژمنې هم لري. د نوموړي په خبره، "د دوامداره پرمختګ موخې" لوی پروګرام دی او د افغانستان لپاره یې د روغتیا، چاپېریال ساتنې، ښوونې، دوامداره پرمختګ، ښې حکومتولۍ او د عدالت د ټینګښت په برخه کې مشخصې موخې ټاکلي دي. ښاغلي صافي زیاته کړه: «موږ د نړیوالې ټولنې د غړي په توګه، هېوادوالو ته د ښو خدمتونو د وړاندې کولو لپاره دغه موخې تعقیبوو.»
د پلان او بهرنیو اړیکو رئیس زیاته کړه، چې لویه څارنوالي له اداري فساد سره د مبارزې، قانون حاکمیت او د عدالت د ټینګښت په برخه کې زیاتې لاسته راوړنې لري. د نوموړي په خبره، لویه څارنوالي د یاد شوي پروګرام تطبیق ته ژمنه ده.
د یادونې وړ ده، چې افغانستان د دوامداره پرمختګ د موخو نړیوال سند د ۲۰۱۵ مېلادي کال د سپټمبر په میاشت کې د ملګرو ملتونو د سازمان په عمومي غونډه کې تائید او د هغې پر تحقق یې ژمنه وکړه. همداراز د یادو موخو د لاسته راوړنو لپاره د وزیرانو شورا د پرېکړې پر بنسټ، په اقتصاد وزارت کې د "افغانستان د دوامداره پرمختګ" سکرتریت هم جوړ شو.
