د لویې څارنوالۍ کارکوونکو ته د جنډر اړوند د ځواب ویوونکې بودیجې جوړونې روزنیز پروګرام جوړ شو
افغانستان کې د عدلي سکتور دملاتړ پروګرام(JSSP) په همکارۍ، د لویې څارنوالۍ د ښځو د ملاتړ ریاست له خوا، د یادې ادارې ۳۰ کارکوونکو ته د «جنډر اړوند د ځواب ویوونکې بودیجې» په نوم روزنیز پروګرام جوړ شو.
د دغه پروګرام له جوړونې څخه موخه، په لویه څارنوالۍ کې د ښځو د متوازن ملاتړ، د جنډر د بنسټونو او د ښځو او ماشومانو د ځورونې د مخنیوي قانون د مادو درک کول بلل شوي، ترڅو جنسیتي نابرابرۍ او د ښځو ځورونه له منځه ولاړه شي او یو خوندي کاري چاپېریال رامنځ ته شي.
په یاد پروګرام کې، جنډر(GRB) ته د یوې ځواب ویوونکې بودېجې جوړنې په موخه، د یو ریفورم په توګه د بودیجې جوړونې په ټولو پړاوونو (د پالیسۍ له برابرونې پیل او په پایلو لاسته راوړنو پای ته رسېدلو)کې د جنډر په هراړخیز شاملولو بحث وشو.
د یادونې وړ ده، چې د جنډر اړوند د یوې ځواب ویوونکې بودیجې جوړونه د یادې ادارې لومړیتوب ګرځېدلی، چې د پلان او پالیسۍ، د پروګرامونو په شننه او بودیجه کې د یادې ادارې د پلان او بهرنیو اړیکو ریاست سره همکاري کوي.
د لویې څارنوالۍ د ښځو د ملاتړ ریاست مسوؤلانو، په ټولو پالیسیو، پلانونو او پروګرامونو کې د جنډر اړوند مسایلو ته ځای او پراختیا ورکول، د یاد پروګرام موخه وبلله.
باید وویل شي، چې د دغه پروګرام په پای کې د (JSSP) دفتر له خوا د پروګرام ګډونوالو ته تصدیق پاڼې هم ورکړل شوې.
