د ماليې وزارت دوه کارکوونکي د ۱۰ زرو امریکايي ډالرو رشوت اخیستلو په تور ونیول شول

د کنټرول او مراقبت څارنوالۍ د ماليې وزارت د خزاینو ریاست دوه کارکوونکي د ۱۰ زرو امریکايي ډالرو رشوت اخیستلو په تور لاس په لاس ونیول. نیول شوي کسان د یوه خصوصي شرکت د کارمن د شکایت له مخې د ۱۴۰۰ لمریز کال د غویي میاشتې پر شلمه، لاس په لاس نیول شوي دي.
د دغه شرکت استازي، د کنټرول او مراقبت څارنوالۍ ته لیکلي، چې له کابله یوه ولایت ته د شرکت د احصايې لېږد لپاره يې ماليې وزارت ته مراجعه وکړه؛ خو د دغه وزارت کارکوونکو د دغه کار د ترسراوي په پلمه، له ده څخه لومړی ۱۵ زره امریکايي ډالره وغوښتل، خو وروسته پر ۱۰ زرو سره سلا شول.
د کنټرول او مراقبت څارنوالۍ د شکایت کوونکي د شکایت پر اساس، دا کسان د ملي امنیت عمومي ریاست د منسوبینو په همکارۍ د اپراتیفي عملیاتو په ترڅ د کابل لومړۍ امنیتي حوزې اړوند د ۱۰ زرو امریکايي ډالرو رشوت اخیستلو پر مهال بالفعل نیولي شوي دي.
دا قضیه د تحقیقاتو د بشپړېدا او د تورنو د عدلي تعقیب په موخه اړوندې څارنوالۍ ته لېږل شوې او تورن هم په توقیف کې دي.
د افغانستان اسلامي جمهوري دولت د لویې څارنوالۍ رهبري له اداري فساد سره مبارزه، د قانون حاکمیت او عدالت تأمین په برخه کې جدي اقدامات او عملي ګامونه اخیستي او تل يې ټینګار کړی، چې هېڅوک له قانونه لوړی نه دی او هېڅ مجرم نه بښل کېږي.