د مهسا د وژنې قضیه محکمې ته لېږل شوې ده
د لویې څارنوالۍ ویاند جمشېد رسولي په یوه خبري کنفرانس کې د ۱۳۹۸ کال د حمل پر ۱۷ د حکومت د رسنیو په مرکز کې وویل، چې د مهسا د وژنې قضیه بشپړه شوې او محکمې ته لېږل شوې ده.
د لویې څارنوالۍ ویاند په دغه خبري کنفرانس کې وویل: «لویې څارنوالۍ له ۲۰ ورځنۍ څېړنې وروسته د یادې قضیې اړوند لاسته راوړنې محکمې ته لېږلې دي.»
ښاغلي رسولي همداراز زیاته کړه، چې د یادې قضیې مؤظفو څارنوالانو د مهسا قاتلینو ته د افغانستان د جزا کود د ۵۴۷، ۲۱۸ او ۲۱۹ مادې په رعایتونې د ۴۹۸ مادې مطابق د محاکمې غوښتنه کړې ده.
نوموړي د خپلو خبرو په دوام سره زیاته کړه، چې لویه څارنوالي د قانون د تطبیق او د عدالت د ټينګښت په برخه کې ځان ژمن ګڼي.
