د مهسا قاتلین په ۳۰-۳۰ کاله بند محکوم شول
د مهسا قاتلین؛ هر یو سجاد آغا د سید آقا زوی او روح الله د نور آقا زوی، د کابل ښار د دویمې حوزې د ابتدایي محکمې له خوا، د ۱۳۹۸ کال د غبرګولي پر پنځمه محاکمه شول.
په دغه قضایي ناسته کې د کابل ښار د دویمې حوزې د ابتدايي محکمې د کورني او بهرني امنیت پر ضد جرمونو د دیوان ریاست قضايي پلاوي، سجادآغا او روح الله د جزا کوډ د ۲۱۸ او ۲۱۹ مادې په رعایتونې د یاد کوډ د ۱۱۴، ۵۴۸ او ۵۹۸ مادې له مخې، په ۳۰ـ ۳۰ کاله تنفیذي بند چې د توقیف له لومړۍ ورځې پیل کېږي، محکوم کړل.
د یادې قضايي ناستې د پلاوي د پرېکړې پر بنسټ، د یادې قضیې له تورنو څخه په لاس راغلي درې مبایلونه، د جزا کوډ د ۱۸۲ مادې له مخې، د مصادرې وړ وبلل شول.
د یادې قضایي ناستې پلاوي، د یادې قضیې د زیانمنو حق العبدي دعوه په قانوني ډول خوندي وبلله او زیاته یې کړه، چې دا وروستي پرېکړه نه ده؛ بلکې تر ټاکلي مودې په یاده قضیه کې دواړه خواوې د نېوکې او استیناف غوښتنې حق لري.
