د نظامي سکټور کمېټې غړو د کورنیو چارو وزارت له ځینو چارواکو سره تعارفي ناستې وکړې
د فرمانونو او حکمونو د تعقیب او نظارت لوی ریاست د نظامي سکټور کمېټې غړو چې مشري یې مولوي نجیب الله انوري کوله، د کورنیو چارو وزارت د پلان، پالیسي او ستراتیژي معین مولوي عبدالحق مخدوم او د نشهيي توکو پر وړاندې د مبارزې معینیت اړوند ریاستونو ځینو رییسانو سره جلا جلا تعارفي ناستې وکړې.
دا ناستې چې د ۱۴۴۴ کال شوال المکرم میاشتې په ۱۳ شوې، پکې د فرمانونو او حکمونو د تعقیب او نظارت لوی ریاست د نظامي سکټور کمېټې غړو د ا.ا.ا مشرتابه ۳۲ ګڼې فرمان په تړاو اړین او هراړخیز معلومات وړاندې کړي دي.
یاد فرمان چې د فرمانونو او حکمونو د تعقیب او نظارت لوی ریاست دندې او واکونه روښانوي، په دې وروستیو کې صادر شوی او د اجرا وړ دی.
ورته مهال، د کورنیو چارو وزارت د پلان، پالیسي او ستراتیژي معین او د نشهيي توکو پر وړاندې د مبارزې معینیت اړوند ریاستونو د فرمانونو او حکمونو د تعقیب او نظارت لوی ریاست نظامي سکټور کمېټې غړو ته د ښه راغلاست ترڅنګ، د مشرتابه د ټولو فرمانونو او حکمونو د پلي کېدا ډاډ ورکړ.
نوموړو همداراز زیاته کړې، د ا.ا.ا. د پرمختګ او کامیابۍ راز په اطاعت کې دی، ځکه خو د مشرتابه د فرمانونو او حکمونو پلي کول او منل په ټولو لازمي دي.
د دغو ناستو موخه، د ا.ا.ا د مشرتابه د فرمانونو او حکمونو تعقیب او څار بلل شوی او دا لړۍ په مرکز او ولایاتو کې په چټکۍ روانه ده.
