د هرات محبوسینو دوسیو او ستونزو ته رسېدنه کېږي
د هرات څارنوالۍ د مختلفو برخو د رئیسانو پلاوي د ۱۴۰۰ لمریز کال د سرطان پر ۱۲ د دغه ولایت د زندانونو د چارو تنظیم مدیریت په همغږۍ د بندیانو دوسيې بررسي کړې.
دا لیدنه د لویې څارنوالۍ د سرپرست د هدایت پر اساس د زندانونو او بندیانو د وضعیت د ارزونې په موخه شوې ده.
دا پلاوی وايي، په دغه ولایت کې د بندیانو له ډلې یوازې د اوو زندانیانو دوسیې چې تمیز محکمې ته د پرېکړې لپاره استولې شوې دی، تر اوسه یې په تړاو نهايي پرېکړه نه ده شوې. پلاوی زیاتوي، چې ۲۸ توقیف شوي کسان چې د کورني او بهرني امنیت جرایمو پر ضد تورن دي، دوسيې يې د تحقیق تر بشپړولو وروسته د دغه ولایت محکمو ته له ذیصلاح مراجعو څخه وړاندیز شوې دي.
همداراز ویل شوي، چې د نورو بندیانو دوسيې پر وخت طی مراحل شوي او په دې برخه کې ستونزه نه لیدل کېږی.
