د وظیفه يي جرایمو د ارتکاب په دلیل د پنځو څارنوالانو د دندو ځنډېدل
د اداري فساد د جرمونو پر ضد د مبارزې څارنوالۍ پنځه څارنوالان د افسوتر او اریانا ټیلیکام خصوصي شرکت د قرارداد د قضيې د ارزونې پر مهال د وظیفه يي جرم د ارتکاب په تور متهم پېژندل شوي او دندې يې ځنډېدلې دي.
د لویې څارنوالۍ عالي شورا د ۱۴۰۰ لمریز کال د چنګاښ پر ۱۷، د تفتیش څارنوالۍ ریاست د راپور تر اورېدو وروسته، د دغې قضیې د څېړنې د موظفو څارنوالانو دندې تعلیق او د اداري فساد د لویو جرمونو پر ضد د مبارزې عدلي او قضايي مرکز څارنوالۍ عمومي رئيس ته یې هدایت ورکړ چې د دغې قضيې له تورنو تحقیقات پيل کړي.
لویه څارنوالي د اداري فساد پر ضد مبارزې ته ژمنه ده او له دغې پدیدې سره په جدیت له فساده د پاک افغانستان په موخه هڅه او مبارزه کوي.
