د پکتیکا ولایتي شورا درې غړي له ناقانونه اسنادو د استفادې په تور محکوم شول
د پکتیا ولایتي شورا درې غړي د تزویر او د ناقانونه پېسو اخېستلو او اسنادو څخه د استفادې په تور، د ۱۳۹۸ کال د چنګاښ پر ۲۴ د اداري فساد له لویو جرمونو سره د مبارزې عدلي او قضايي مرکز له خوا، په علني ډول محاکمه شول.
د قضیې مؤظف څارنوال، د دعوې له ترتیب او څېړنو له بشپړاوي وروسته د اسنادو او شواهدو له مخې یادو تورنو کسانو ته د جزا قانون د ۱۵۶ او ۳۱۰ مادې شپږمې فقرې دویم بند په رعایتولو د جزا کوډ د ۱۷، ۳۹۶ او ۳۹۷ مادې له مخې د مجازاتو غوښتنه وکړه.
په یاده قضیه کې د پکتیکا ولایتي شورا غړي؛ حنیفه کټوازۍ د بازخان لور، دیانا صاحب زۍ د روزجمعه لور او عبدالجلیل د عید محمد زوی محاکمه شول.
د ناستې قضایي پلاوي، یاد کسان د تزویري اسنادو او شهادتنامو او ناقانونه پېسو د اخېستلو په تور د جزا کوډ د ۱۷، ۷۳، ۳۹۶، ۳۹۸ په رعایتونې د جزا کوډ د ۳۱۰ مادې دویمې فقرې شپږم بند او د جزايي اجرااتو قانون د ۲۰۹ او ۲۳۹ مادې له مخې هر یو په یو کال او دوو میاشتو تنفیذي بند محکوم کړل.
همداراز د قضایي پلاوي د پرېکړې پر بنسټ، حنیفه کټوازۍ په دوو میلیونو او اویا زره افغانیو، دیانا صاحب زۍ په یو میلیون او اته سوه زره افغانیو او عبدالجلیل په دوو میلونو او ۶۴ زره افغانیو په نغدي ډول هم محکوم شول.
