د څارنوال مجلې او جریدې د کتنپلاوي غونډه ترسره شوه
د څارنوال د مجلې او جریدې د کتنپلاوي غونډه د روان کال د تلې پر پنځمه د قضایي تعقیب په چارو کې د لوی څارنوال مرستیال ډاکټر غلام حیدر علامه او د دغه کتنپلاوي په ګډون ترسره شوه.
نوموړې غونډه د څارنوال مجلې او جریدې د معیاري کولو په موخه په هرو دوه اوونیو کې یو ځل ترسره کېږي او د دغو خپرونو پر مطالبو بحث کوي.
ښاغلي علامه د لوی څارنوال د مجلې او جريدې خپراوی ګټور ګام ګڼي او زیاتوي، چې دا چاره کولای شي، خلک د لویې څارنوالۍ له فعالیتونو خبر کړي.
نوموړی وايي: «د دغو خپرونو لپاره د بازارموندنې په برخه کې کار ته اړتیا ده او د دې لپاره چې دا خپرونې ولس ته ورسېږي، د پلازمېنې او ولایتونو لویو کتابتونونو او کتابپلورنځیو ته دې څو څو ګڼې ووېشل شي».
د خپرونو لپاره بازارموندنه د مجلې او جریدې د خپرولو مالي برخه پياوړې کوي او د نورو له احتیاجه یې باسي.
کتنپلاوی ټینګار کوي، چې څارنوال مجله باید په ځانګړیو ستاینغونډو کې څارنوالانو ته د نشراتو د ریاست له لوري د نوموړیو د ستاينې پر مهال ورکړل شي، چې دا چاره به لا هم د مجلې د تبلیغ او اعتبار برخه کې مرستندویه ثابته شي.
هېره دې نه وي، چې د اطلاعاتو او عامه اړیکو ریاست په زیار اوونۍ مخکې د څارنوال مجلې ۴۷مه ګڼه چاپ شوه. په دغه مجله کې د بېلابېلو لیکوالو ګټورې حقوقي، ژورنالېستي او ادبي مقالې چاپ شوې دي.
