د ښځو پر وړاندې د تاوتریخوالي د مخنیوي څارنوالان په ټولنه کې د طبیب حیثیت لري
دا خبره د تحقیق په چارو کې د لوی څارنوال مرستیال نورحبیب جلال د ۱۳۹۷ کال د سلواغې پر درېیمه د ښځو پر وړاندې د تاوتریخوالي د مخنیوي په برخه کې د قانون حاکمیت د همغږۍ ملي کنفرانس په پایله کې وکړه.
د تحقیق په چارو کې د لوی څارنوال مرستیال په دغه پروګرام کې وویل: «د ښځو پر وړاندې د تاوتریخوالي د مخنیوي څارنوالان د قانون د حاکمیت، د عدالت د ټينګښټ او د مظلومانو د حق غوښتنې رسالت پر غاړه لري.» ښاغلي جلال زیاته کړه، چې ټول څارنوالان په ځانګړې توګه د ښځو پر وړاندې د تاوتریخوالي د مخنیوي څارنوالان باید د یاد شوي کنفرانس له لاسته راوړنو څخه د قانون د تطبیق او د کورنیو د ارامتیا په برخه کې کار واخلي. د نوموړي په خبره، څارنوالان باید ټولو قضیو په ځانګړې توګه د کورنیو ستونزو قضیو ته د رسیدګۍ په ټولو مرحلو کې په پوره پاملرنې او ځېرکۍ چلن وکړي. د تحقیق په چارو کې د لوی څارنوال مرستیال د خپلو خبرو په دوام زیاته کړه: «په ټولنه کې د ښځو پر وړاندې د تاوتریخوالي له منځه وړل، د ښځو پر وړاندې د تاوتریخوالي د له منځه وړلو د څارنوالانو رسالت ګڼل کیږي، هغه رسالت چې په واقعي ډول په کورنیو کې د ښځو د اسوده ژوند او مقام زمینه برابره کړي.»
د ښاغلي جلال په باور، له چا سره چې تاوتریخوالی کیږي، د عامه پوهاوي له لارې عدالت ته رسېدلای شي. نوموړي د خپلو خبرو په دوام سره وویل: «موږ باید د افغانستان هر ګوټ ته دا پیغام ورسوو، چې موږ د انسان، انسانیت او عدالت لپاره کار کوو تر څو له تاوتریخوالي پاکه ټولنه ولرو.»
په ورته مهال کې په افغانستان کې د حقونو د پراختیا نړیوال سازمان (IDLO) مسؤولې لیزلي شنایډر وویل، چې دا سازمان یو حکومتي نړیوال سازمان دی، چې د قانون پر حاکمیت ټینګار کوي. نوموړې زیاته کړه: «موږ د نړیوالو بشري حقونو له مخې خپله دنده مخ ته وړو او هڅه کوو، چې خلک له تاوتریخوالي څخه لرې او په کرامت سره ژوند وکړي.»
د یادونې وړ ده، چې یاد شوی کنفرانس د روان کال د سلواغې پر لومړۍ پیل او درې ورځې یې دوام وکړ. د دغه کنفرانس ګډونوالو د ښځو پر وړاندې د تاوتریخوالي په برخه کې پر شته ستونزو او ګواښونو او همداراز د دغې ناوړه پدیدې پر له منځه وړلو هراړخیز بحث وکړ او د دغه ستونزو د هواري په موخه یې غوره لارې چارې هم وړاندې کړې.
