د کابل استیناف محکمې د مهسا وژونکي په ۳۰ -۳۰ کاله بند محکوم کړل
د مهسا وژونکي؛ هر یو سجاد آغا د سید آقا زوی او روح الله د نور آقا زوی، د کابل استیناف محکمې له خوا، د ۱۳۹۸ کال د چنګاښ پر ۳۰مه، محاکمه کړل.
په دغه قضايي ناسته کې د کابل ښار د استیناف محکمې، د کورني او بهرني امنیت پر وړاندې د جرمونو د دیوان ریاست قضایي پلاوي، سجاد اغا او روح الله د جزا کوډ د ۲۱۸ او ۲۱۹ مادې په رعایتونې د یاد کوډ د ۱۱۴، ۵۴۸ او ۵۹۸ مادې له مخې په ۳۰-۳۰ کاله تنفیذي بند، چې د توقیف له لومړۍ ورځې پیلېږي، محکوم کړل.
د کابل استیناف محکمې د لومړۍ ابتدايي محکمې پرېکړه، چې د چنګاښ پر ۵مه، شوې وه تائید او زیاته یې کړه، چې نوموړي هر یو سجاد اغا او روح الله د تذکرې له مخې، له ۲۰ کلونو څخه کم ګڼل شوي او څوک چې دغه عمر پوره نه کړي د اعدام حکم نه شو ورباندي کولای.
د یادې قضایي ناستې پلاوي، د قضیې د زیانمنو حق العبدي دعوه په قانوني ډول خوندي وبلله او زیاته یې کړه، چې دا وروستۍ پرېکړه نه ده؛ بلکې تر ټاکلي مودې په یاده قضیه کې دواړه خواوې د نېوکې او غوښتنې حق لري.
