د کابل د سویل زون استیناف څارنوالۍ رئيس معرفي شو
د کابل د ختیځ زون استیناف څارنوالۍ پخوانی رئیس څارنمل دکتور جمیل الرحمن کامګار د لویې څارنوالۍ په وړاندیز او د جمهوري ریاست په حکم د کابل د سویل زون استیناف څارنوالۍ د نوي رئيس په توګه وګومارل شو.
د نوموړي د معرفۍ غونډه د ۱۴۰۰ لمریز کال د غبرګولي پر لومړۍ وشوه. په دې غونډه کې د لویې څارنوالۍ د سرچینو او ادارې عمومي رئیس وحیدالدین ارغون، د سترې محکمې عمومي جزا څارنوالۍ رئيس، د کابل د شمال زون استیناف څارنوالۍ رئيس، د کابل استیناف څارنوالۍ او د کابل د شمال ختیځ زون استیناف څارنوالۍ رئيسانو او ځینو نورو مسؤولانو ګډون کړی و.
د لويې څارنوالۍ د سرچینو او ادارې عمومي رئيس وحیدالدین ارغون ښاغلي کامګار ته د کابل د سویل زون استیناف څارنوالۍ د رئیس په توګه د ګومارنې مبارکي ورکړه او له هغه يې وغوښتل، چې د قانون د تطبیق، د عدالت د تأمین او د عدلي خدماتو د وړاندې کولو په برخه کې دې پوره پوره هڅه وکړي.
په ورته وخت کې ښاغلي کامګار د لويې څارنوالۍ رهبرۍ او د هېواد د جمهور رئيس د باور مننه وکړه او زیاته يې کړه، چې پوره رښتینولۍ به د هېوادوالو چوپړ کوي.
