د کابل څرخي پله زندانه ۳۱۲ زندانیان ازاد شول
دغه زندانیان چې ۳۰۰ یې نارینه او پاتې نور یې ښځې وې، د جمهوري ریاست د فرمان له مخې چې د غويې د اتمې (د افغانستان د مقدس جهاد د بري) په مناسبت صادر شوی و، د ۱۳۹۷ کال د غویي پر اتمه له بند څخه ازاد شول. له دغو زندانیانو څخه د ځینو د بند موده کمه شوه او ځینې نور ازاد شول.
د دغو زندانیانو د ازادېدو پر مهال د احکامو پر تنفیذ د نظارت څارنوالۍ او د حبس د بدیل او همداراز د فرمانونو د تطبیق، بخښنې او تخفیف کمېټې رئیس محمد اسعد ساپي، د محکمو د اړیکو عمومي رئیس شاه میر امیري، د کابل څرخي پله زندان رئیس محمد تواب احمدزي او د فرمانونو د بخښنې او تخفیف کمېسیون ځینو نورو غړو هم ګډون کړی و.
د احکامو پر تنفیذ د نظارت څارنوالۍ او د حبس د بدیل او همدارنګه د فرمانونو د تطبیق، بخښنې او تخفیف کمېټې رئیس محمد اسعد ساپي په دغه پروګرام کې وویل: «ازادي د خدای یو لوی نعمت دی او د لویې څارنوالۍ رهبري تل هڅه کوي تر څو د هېوادوالو حقوق خوندي کړي.»
د ښاغلي ساپي په باور، بې له ځنډه د زندانیانو د بخښنې او تخفیف د فرمانونو پلي کول د هېوادوالو حقونو ته د لویې څارنوالۍ د پاملرنې ښکارندويي کوي.
نوموړي زندانیانو ته په خطاب کې وویل: «تاسې سر له اوسه باید د یو سالم شخص په توګه خپل عادي ژوند ته ادامه ورکړئ او نورو ته باید یوه نمونه وګرځئ.»
همداراز ښاغلي ساپي زیاته کړه، چې د عدلي او قضایي څانګو د مسؤولانو چلند به له هغه زندانیانو سره چې بیا زندان ته د مجرم په توګه راځي جدي وي؛ نو هغه زندانیان چې ازادیږي، په راتلونکي کې نه باید چې جرم وکړي.
نوموړي همدارنګه ټینګار وکړ، چې د لویې څارنوالۍ رهبري هڅه کوي تر څو قانون یو شان پلی کړي.
په ورته مهال کې د محکمو د اړیکو عمومي رئیس وویل، چې د مجرم په نیولو سره نه یوازې مجرم اصلاح کېږي؛ بلکې ټولنیز ارزښتونه، عدالت او د خلکو ځان، مال او حقوق هم ورسره خوندي کېږي.
ښاغلي امیري د بخښنې او تخفیف فرمانونو د تطبیق کمېټې هلې ځلې بې ساري وبللې او زیاته یې کړه: «په وروستیو کې د دې کمیسیون رئیس او غړو د خپلو هلو ځلو په پایله کې وکولای شول، چې په لومړۍ ورځ دغه فرمان تطبیق کړي او د نوموړي دا کار د ستایلو دی.»
د نوموړي په باور، دغه مسأله د عدالت ټینګولو په برخه کې یوه لاسته راوړنه ګڼل کېږي او په دې سره لویه څارنوالي د خلکو په زړونو کې ځای پیدا کوي.
د محکمو د اړیکو رئیس زیاته کړه:«دا د خوشحالۍ ځای دی، چې په همدې لومړي ورځ زندانیان او د دوی کورنۍ د دغه فرمانونو له ګټو برخمن کېږي.»
نوموړي زندانیانو ته په اشارې سره وویل، چې دوی باید د زندان د سختې فضا او محدود ژوند په هکله خپلې تجربې او ستونزې له خپلو ملګرو سره شریکې کړې تر څو نور خلک له جرمي کړنو ډډه وکړي.
له بلې خوا د کابل څرخي پله زندان رئيس محمد تواب احمد زي د لویې څارنوالۍ، په ځانګړې توګه پر احکامو د تنفیذ نظارت څارنوالۍ او د حبس د بدیل او د بخښنې او تخفیف فرمانونو د تطبیق له کمېسیون څخه په خپل وخت د فرمانونو د پلي کولو له امله مننه وکړه.
ښاغلي احمدزي زندانیانو ته په اشارې سره وویل: «تاسې زندان ته د مجرم په نوم راغلي وئ او دا د خوشحالي ځای دی چې اوس د یو سالم شخص په توګه له خپلې کورنۍ او ټولنې سره بېرته یوځای کېږئ.»
نوموړي همدارنګه وضاحت ورکړ، چې د غويي اتمې د دغه فرمان د تطبیق لومړی پړاو دی، د کمېسیون کار دوام لري او تمه ده چې په راتلونکو ورځو کې به نور زندانیان هم له بنده ازاد شي.
دا په داسې حال کې ده، چې په دې وروستیو کې د لويې څارنوالۍ رهبري او د بخښنې او تخفیف فرمانونو د تطبیق کمېسیون هڅه کوي چې دا ډول فرمانونه په لنډ وخت کې پلي کړي.
